দুবাৰকৈ গৰ্ভপাতৰ পৰা অসহ্যকৰ দাম্পত্য জীৱনলৈ, নিজৰ অকথিত কাহিনী খুলি ক’লে মহিমা চৌধুৰীয়ে!

পৰিচালক সুভাষ ঘাই (Subhash Ghai)–এ ভাৱিছিল যে তেওঁৰ ছবিৰ নায়িকাৰ নাম ‘ম’ আখৰেৰে হ’লে ছবি হিট হ’ব। আৰু সেইবাবেই ‘পৰদেশ’ (Pardes) ছবিত ৰিতু চৌধুৰী (Ritu Chaudhry) হৈ পৰিল মহিমা চৌধুৰী (Mahima Chaudhry)। ছবি বক্স অফিচত ছুপাৰহিট হ’ল। মহিমাৰ হাঁহি–অভিনয়ে দৰ্শকৰ মন মুহিলে। কিন্তু তাৰ পিছত এখন দুখন ছবিত হিট ছবিৰ বাদে লাহে লাহে মহিমা হেৰাই গ’ল বলীউদৰ অৰণ্যত। ২০০৬ চনত স্থপতিবিদ ববি মুখাৰ্জীৰ সৈতে বিবাহপাশত আবদ্ধ হয় মহিমা। কিন্তু সেই সম্পৰ্ক দীৰ্ঘস্থায়ী নহ’ল। ২–১৩ চনত বিবাহ বিচ্ছেদ হয় দুয়োৰে।

সম্প্ৰতি এক সাক্ষাৎকাৰত মহিমাই ক’লে তেওঁৰ কেতবোৰ দুখলগা স্মৃতি। বন্ধু হওক বা আত্মীয়–স্বজন, কাকোৱে মন খুলি নিজৰ সমস্যাৰ কথা খুলি ক’ব পৰা নাছিল অভিনেত্ৰীগৰাকীয়ে। কাৰণ কাৰো সৈতে সমস্যা শ্বেয়াৰ কৰাৰ পূৰ্বে তেওঁ ভাবিছিল যে এয়া সামান্য সমস্যা, হয়তু আঁতৰি যাব। এইদৰেই এটাৰ আনটো সমস্যা আহি পৰিছিল জীৱনলৈ। প্ৰথমে এটি কন্যা সন্তানৰ পিছত আৰু এটি সন্তান বিচাৰিছিল মহিমাই। কিন্তু দুবাৰকৈ গৰ্ভধাৰণ কৰাৰ পিছতো গৰ্ভপাত হৈছিল। সেয়া অভিনেত্ৰীগৰাকীৰ বাবে আছিল এক ডাঙৰ মানসিক চিন্তা। য’তেই থাকে তাতেই সুখৰ অভাৱ আছিল বুলি ধাৰণা কৰিছিল মহিমাই।

স্মৃতি ৰোমন্থন কৰি মহিমাই কয়, যেতিয়াই কোনো অনুষ্ঠান বা শ্বুটিং কৰিবলৈ বাহিৰলৈ গৈছিল, কন্যা আৰিয়ানাক মাতৃৰ কাষত থৈ যাবলগীয়া হৈছিল। এবাৰ নিজেই কন্যাৰ সৈতে মাতৃৰ কাষত দুদিন থাকি যায়। মহিমাৰ অনুভৱ হৈছিল, এয়াই শান্তিৰ ঠাই। আৰু তেতিয়াই বিবাহ বিচ্ছেদৰ সিদ্ধান্ত সম্ভৱত মনলৈ আহিছিল।

১৯৯৯ চনত অজয় দেৱগন (Ajay Devgan) আৰু কাজল (Kajol) অভিনীত দিল ক্যা কৰে (Dil Kya Kare)ত কাম কৰিছিল মহিমা। আৰু তেতিয়াই এক ট্ৰাক দুৰ্ঘটনাৰ কবলত পৰিছিল। ট্ৰাকৰ সন্মুখৰ আইনা ভাঙি মহিমাৰ মুখত লাগিছিল। ছবিৰ প্ৰযোজকো আছিল অজয় আৰু কাজল। তেওঁলোকে এই বিষয়টো গোপনে ৰাখিছিল, কাৰণ জনাজাত হ’লে মহিমাৰ কেৰিয়াৰৰ বাবে ভাল নহ’লহেঁতেন।

মহিমা আজিও কৃতজ্ঞ প্ৰযোজক অজয় দেৱগনৰ ওচৰত। মহিমাক চিকিৎসকক দেখুওৱাৰ পৰা তেওঁৰ শুশ্ৰুষাৰ দায়িত্ব লৈছিল অজয়ে।