IPL 2021: আইপিএলত কেএল ৰাহুলৰ বাবেই পঞ্জাৱ কিংছে হাৰিছে ইখনৰ পিছত সিখন খেল! পৰিসংখ্যাই ইয়াৰ প্ৰমাণ।

আইপিএল ২০২১(IPL 2021)ত দেওবাৰে দিল্লী কেপিটেলছৰ(Delhi Capitals) বিৰুদ্ধে ১৯৫ ৰাণৰ বৃহৎ স্কোৰ কৰাৰ পিছতো লজ্জাজনক পৰাজয়ৰ সন্মুখীন হ’ল পঞ্জাৱ কিংছ(Punjab Kings)। মায়াংক আগৰৱালৰ ৬৯ ৰাণৰ লগতে কে এল ৰাহুলৰ(KL Rahul) ৬১ ৰাণৰ অৰ্ধশতকীয় ইনিংছৰ অৱদান স্বত্বেও পৰাজয়ৰ মুখ দেখিলে পঞ্জাৱ কিংছে।

আইপিএলত ৰাণ কৰাৰ ক্ষেত্ৰত এই পৰ্যন্ত  শিখৰ ধাৱন আৰু গ্লেন মেক্সৱেলৰ পিছতে কেএল ৰাহুল তৃতীয় স্থানত থাকিলেও, ৰাহুলৰ টীম পঞ্জাৱ কিংছ দুখন খেলত পৰাজিত হৈ তালিকাৰ সপ্তম স্থানতহে আছে। কেএল ৰাহুলে তিনিখন খেলৰ দুখনতেই অৰ্ধশতক কৰিছে যদিও তেওঁৰ দলে মাত্ৰ এখনতহে জয়লাভ কৰিছে, দুখনতেই হাৰিছে।

দিল্লী কেপিটেলছৰ বিৰুদ্ধে পৰাজয়ৰ বাবে কৰোবাত নহয় কৰোবাত জগৰীয়া কে এল ৰাহুল। পৰসংখ্যাই ইয়াৰ প্ৰমাণ দিয়ে।

ৰাহুলে ৫১ টা বলত কৰিছিল ৬১ ৰাণ। মানে মুঠ ১২০টা বলৰ ৪২ শতাংশ বলেই খেলিছিল অকলে ৰাহুলে। ৰাহুলৰ ৰাণ ৰেট হ’ল ৭.১৭, কিন্তু দলীয় ৰাণ ৰেট আছিল ১০.২৫। মায়াংক আগৰৱাল আৰু কেএল ৰাহুলে ১২.৪ অভাৰত কৰিছিল ১২২ ৰাণ। কিন্তু ইমানৰ পিছতো ৰাহুলৰ নিজা ৰাণ ৰেট কম হোৱাৰ বাবেই ২০০ ৰাণৰ ঘৰ অতিক্ৰম কৰিব নোৱাৰিলে পঞ্জাৱ কিংছে। যাৰ ফলত পৰাজয়ৰ বলি হ’ল দলটো।

আইপিএলত কেএল ৰাহুলে অৰ্ধশতক কৰিলেও দল হাৰে

২০১৮ৰ পৰা যদি পৰিসংখ্যা বিশ্লেষণ কৰাহয় তেন্তে দেখা যায় যে যিমান খেলত ৰাহুলে ৫০ বা তাতকৈ অধিক ৰাণ কৰিছে তাৰ ভিতৰত ১০খন খেলত দল পৰাস্ত হৈছে। ৰাহুলৰ পিছতেই এই ৰেকৰ্ড আছে ছানৰাইজাৰ্ছ হায়দৰাবাদৰ মনীষ পাণ্ডেৰ নামত । যাৰ নিজা ৫০ ৰাণৰ প্ৰতিটো ইনিংছৰ খেলত দলে হাৰিছে ৭ খনত।

আইপিএলত বিজয়ৰ ৰেকৰ্ড ভাল নহয় ৰাহুলৰ

আইপিএলত কেএল ৰাহুলে যিকেইখন খেলত ৪০ৰ অধিক বল খেলিছে তাৰ ভিতৰত ৭খনত জয় হৈছে ৯ খনতেই হাৰিছে। ৰাহুলৰ বিজয়ৰ হাৰ ৪৩.৭৫শতাংশ। এক কথাত আইপিএল ২০২১ত পঞ্জাৱ কিংছে যদি টিকি ঠাকিব বিছাৰে তেন্তে ৰাহুলে ৰাণ কৰা গতি আৰু দ্ৰুত কৰিবই লাগিব।