‘কাঞ্চনজংঘা চাই যি সকলে গঠনমূলক সমালোচনা কৰিছে তেওঁলোকক বেয়া ব্যৱহাৰ নকৰিবা’

মুক্তিপালে জুবিন গাৰ্গৰ বহু চৰ্চিত ছবি কাঞ্চনজংঘা। মুক্তিৰ পিছতে এতিয়া দৰ্শকে আদৰি লৈছে ছবিখন। দেওবাৰলৈকে শেষ কাঞ্চনজংঘাৰ টিকট। কিন্তু ছবিখন চোৱাৰ পিছত যদি কোনো লোকে ছবিখনৰ কোনো কোনো দিশ সমালোচনা কৰিছে, সেইসকলক ছচিয়েল মিডিয়াত আক্ৰমণৰ লক্ষ্য কৰি লৈছে জুবিন গাৰ্গৰ একাংশ অনুৰাগীয়ে।

অনুৰাগী সকলৰ এনে আচৰণত এতিয়া অসন্তুষ্টি ব্যক্ত কৰিছে জুবিন গাৰ্গে। জুবিন গাৰ্গে নিজৰ ফেচবুক একাউণ্টৰ জৰিয়তে অনুৰাগী সকলক জনাইছে বিনম্ৰ অনুৰোধ। জুবিন গাৰ্গে উল্লেখ কৰিছে যে, ‘ ছবিখন চোৱাৰ পিছত যদি কোনো লোকে ছবিখনৰ সন্দৰ্ভত গঠনমূলক সমালোচনা আগবঢ়াইছে, তেওঁলোকক বেয়া ব্যৱহাৰ নকৰিবা, ছবিখন এতিয়া অসমৰ ৰাইজৰ ছবি,  ‘মৰম বিলোৱা, খং নহয়’’!