চনু সুদ স্বভাৱজাত অপৰাধী! বম্বে হাইকৰ্টত কিয় এই শপতনামা? জানক সবিশেষ

মুম্বাইঃ মুম্বাই নগৰ নিগমে (BMC)  বম্বে উচ্চ ন্যায়ালয়ত (Bombay High Court) মঙলবাৰে দাখিল কৰা শপতনামাত অবৈধ নিৰ্মাণক লৈ (Illegal Construction) চনু সুদৰ বিৰুদ্ধে বৃহৎ অভিযোগ আনিছে। বিএমচিয়ে অভিনেতাগৰাকীক এই নটিচ উপনগৰ জুহুস্থিত তেওঁৰ বহুমহলীয়া ভৱনত বিনা অনুমতিত পৰিৱৰ্তন কৰাক লৈ জাৰি কৰিছিল। ইয়াৰ পিছতে অভিনেতাজনে বম্বে হাইকৰ্টৰ দ্বাৰস্থ হৈছিল। এতিয়া বিএমচিৰ ফালৰ পৰা হাইকৰ্টত কোৱা হৈছে বলিউড অভিনেতা চনু সুদ (Sonu Sood) 'স্বভাৱজাত অপৰাধী’। তেওঁ ইয়াৰ পূৰ্বে দুবাৰ ভাঙি পেলোৱাৰ পিছতো জুহুত এক আৱাসিক ভৱনত নিজৰ মৰ্জিমতে বেআইনীভাৱে নিৰ্মাণ কাৰ্য কৰাইছিল।

উল্লেখ্য যে, বিএমচিয়ে যোৱা বছৰ অক্টোবৰ মাহত চনু সুদৰ বিৰুদ্ধে নটিচ জাৰি কৰিছিল। এই নটিচক যোৱা ডিচেম্বৰ মাহত দেৱানী আদালতত প্ৰত্যাহ্বান জনাইছিল চনুৱে। কিন্তু আদালতে তেওঁৰ আৱেদন খাৰিজ কৰে। ইয়াৰ পিছতে তেওঁ উচ্চ ন্যায়ালয়ৰ দ্বাৰস্থ হয়। উচ্চ ন্যায়ালয়ে বিএমচিক এই সন্দৰ্ভত শপতনামা দিবলৈ কয়। বিএমচিৰ অভিযোগ আছিল যে চনু সুদে ছয়মহলীয়া ‘শক্তি সাগৰ’ আৱাসিক ভৱনটো সলনি কৰি বাণিজ্যিক হোটেললৈ পৰিণত কৰিছিল।

নগৰ নিকায়ে নিজৰ শপতনামাত উল্লেখ কৰে, ‘আৱেদনকৰ্তা স্বভাৱজাত অপৰাধী আৰু অকৰ্তৃত্বশীল হিচাপে টকা ঘটিব বিচাৰে। গতিকে তেওঁ লাইচেন্স বিভাগৰ অনুমতি নোলোৱাকৈ ভাঙি পেলোৱা ভৱনৰ অংশত আকৌ অবৈধ নিৰ্মাম কৰি হোটেল হিচাপে ব্যৱহাৰ কৰিবলৈ বিচাৰে।'