কোভিশ্বিল্ড, কোভাক্সিন নে স্পুটনিক V? কোভিড ভেকচিনৰ কোনটো আটাইতকৈ ভাল?

দেশত কোভিড সংক্ৰমণৰ ঘটনা ব্যাপক হাৰত বৃদ্ধি হৈ থকাৰ মাজতেই ১ মে'ৰ পৰা তৃতীয় পৰ্যায়ত অৰ্থাৎ ১৮ বছৰ বয়সৰ ঊৰ্ধ্বৰ লোকৰ বাবেও আৰম্ভ হৈছে টীকাকৰণ অভিযান। ভেকচিনৰ পৰ্যাপ্ত সামগ্ৰীৰ অভাৱৰ বাবেই বহু ৰাজ্যত এই অভিযান এদিন বা দুদিন পলমকৈ আৰম্ভ কৰা হ'ব। যদিও দেশৰ জনসাধাৰণৰ বাবে উপলব্ধ ভেকচিনবোৰৰ বিষয়ে জনাটো সকলোৰে বাবে অতি গুৰুত্বপূৰ্ণ। ইতিমধ্যে কোভিশ্বিল্ড নে কোভাক্সিন কোনটো ভেকচিন অধিক কাৰ্যকৰী বিষয়টোক লৈ সাধাৰণ ৰাইজৰ মাজত বিতৰ্ক চলি থকাৰ মাজতে এতিয়া দেশৰ জনসাধাৰণৰ বাবে উপলব্ধ হ'ব তৃতীয়টো ভেকচিন – স্পুটনিক V।

বিগত ১৬ জানুৱাৰীৰ পৰাই কোভাক্সিন আৰু কোভিশ্বিল্ড ব্যৱহাৰ কৰা হৈছে যদিও এতিয়াৰে পৰা লগতে স্পুটনিক Vও ব্যৱহাৰ কৰা হ'ব। ভাল কথাটো হ'ল এই তিনিওটা ভেকচিনেই কোৰোণা ভাইৰাছৰ দ্বাৰা হোৱা সংক্ৰমণৰ সৈতে মোকাবিলা কৰাত ১০০%ই কাৰ্যকৰী। সেয়েহে সমগ্ৰ বিশ্বৰ বিজ্ঞানীসকলে কৈছে যে যি ভেকচিন উপলব্ধ সেয়াই গ্ৰহণ কৰক। আপোনাৰ জীৱন সুৰক্ষিত হোৱাটোহে অতি গুৰুত্বপূৰ্ণ। কিন্তু তথাপিও আমি জানিব লাগিব এই ভেকচিনৰ বিষয়ে।

তিনিওটা ভেকচিনৰ ভিতৰত কোনটো আটাইতকৈ ভাল?

এইক্ষেত্ৰত তিনিওটা ভেকচিনেই ভাল। আপুনি যি পাইছে, সেয়াই গ্ৰহণ কৰক। ভেকচিন অভিযান আৰম্ভ হোৱা দিনটো অৰ্থাৎ ১৬ জানুৱাৰীৰ পৰাই ভাৰতত কোভাক্সিন আৰু কোভিশ্বিল্ড ব্যৱহাৰ কৰা হৈছে। কোভাক্সিন সম্পূৰ্ণৰূপে ভাৰতত বিকশিত কৰাৰ বিপৰীতে কোভিশ্বিল্ড অক্সফৰ্ড বিশ্ববিদ্যালয় আৰু এষ্ট্ৰাজেনেকাই যুটীয়াভাৱে বিকশিত কৰিছে আৰু ইয়াক পুনেৰ চিৰাম ইনষ্টিটিউট অৱ ইণ্ডিয়াত নিৰ্মাণ কৰা হৈছে।

ইপিনে ১ মে'ত ৰাছিয়াৰ ভেকচিন স্পুটনিক V-য়েও দেশত কোৰোণা ভাইৰাছৰ বিৰোধী যুঁজত যোগদান কৰে। এই ভেকছিন ৰাছিয়ান ডেভেল’পমেণ্ট এণ্ড ইনভেষ্টমেণ্ট ফাণ্ড (RDIF)ৰ সহায়ত মস্কোৰ গামালিয়া ৰিচাৰ্চ ইনষ্টিটিউট অফ এপিডেমিঅ'লজী এণ্ড মাইক্ৰ'বায়োলজীত বিকশিত কৰা হৈছে। এই ভেকছিনটো ভাৰতত ছয়টা কোম্পানীয়ে হায়দৰাবাদৰ ড০ ৰেড্ডীৰ গৱেষণাগাৰৰ তত্বাৱধানত প্ৰস্তুত কৰে। আৰম্ভণিতে ১.২৫ কোটি এই ভেকচিনৰ ড'জ আমদানি কৰা হ'ব।

এই তিনিওটা ভেকচিনৰ কিছুমান ক্ষেত্ৰত পৃথক লাভালাভ আছে। কোভিশ্বিল্ড হৈছে বিশ্বৰ আটাইতকৈ জনপ্ৰিয় ভেকচিন যাক সৰ্বাধিক দেশত ব্যৱহাৰ কৰা হৈছে। আনকি বিশ্ব স্বাস্থ্য সংস্থাইয়ো এই ভেকচিনটো ব্যৱহাৰ কৰিবলৈ সন্মতি দিছে। একে সময়তে, কোভাক্সিন কেৱল ভাৰতত ব্যৱহাৰ কৰা হয় আৰু ই ভাইৰাছৰ প্ৰকাৰ পৰিৱৰ্তনৰ সৈতে যুঁজিবলৈ এক সৰ্বশ্ৰেষ্ঠ ভেকচিন হিচাপে আত্মপ্ৰকাশ কৰিছে। একেদৰে, স্পুটনিক Vয়ে ভাৰতকে ধৰি ৬০ খনতকৈও অধিক দেশৰ অনুমোদন লাভ কৰিছে।

এই ভেকচিনবোৰ কেনেদৰে বিকশিত কৰা হৈছে?

কোভাক্সিন এটা পৰম্পৰাগতভাৱে নিষ্ক্ৰিয় প্লেটফৰ্মত বিকশিত কৰা হৈছে। যাৰ অৰ্থ হৈছে, মৃত ভাইৰাছটো শৰীৰত সুমুৱাই দিয়া হয় যি এণ্টিবডী সঁহাৰিক প্ৰহাৰ কৰে আৰু শৰীৰে ভাইৰাছবিধ চিনাক্ত কৰাৰ লগতে ইয়াক প্ৰতিৰোধ কৰিবলৈ এণ্টিবডী গঠন কৰে।
কোভিশ্বিল্ড হৈছে এক ভাইৰেল ভেক্টৰ ভেকচিন। চিম্পাঞ্জীত পোৱা এডেনোভাইৰাছ ChAD0x1 ব্যৱহাৰ কৰি ইয়াক বিকশিত কৰা হৈছে। ইয়াৰ সহায়ত, এক স্পাইক প্ৰ'টিন বিকশিত কৰা হয় যি কোৰোণা ভাইৰাছৰ দৰে আৰু ইয়ে শৰীৰত বেজী দিয়াৰ সময়ত সুৰক্ষা দিয়া আৰম্ভ কৰে।

স্পুটনিক V হৈছে এটা ভাইৰেল ভেক্টৰ ভেকচিন। একমাত্ৰ পাৰ্থক্যটো হ'ল যে ইয়াক এটাৰ পৰিৱৰ্তে, দুটা ভাইৰাছৰ দ্বাৰা বিকশিত কৰা হয়। কিন্তু ইয়াত দুয়োটা ড'জ পৃথক, আনহাতে কোভাক্সিন আৰু কোভিশ্বিল্ডত দুয়োটা ড'জ একেই।

কিমান ব্যৱধানৰ পিছত কিমানটা ড'জৰ প্ৰয়োজন?

তিনিওটা ভেকচিন হৈছে ডাবল ড'জৰ ভেকচিন। ইয়াৰ অৰ্থ হৈছে ৰোগ প্ৰতিৰোধ সঁহাৰিৰ বাবে দুটা ড'জ লোৱাটো অত্যাৱশ্যকীয়। এই ভেকচিন সদায়েই হাতত কান্ধৰ ওচৰত দিয়া হয়।

কোভাক্সিনৰ দুটা ড'জ ৪ৰ পৰা ৬সপ্তাহৰ ব্যৱধানত গ্ৰহণ কৰিব লাগিব। কোভিশ্বিল্ডৰ দুটা ড'জ ৬ৰ পৰা ৮ সপ্তাহৰ ব্যৱধানত গ্ৰহণ কৰিব লাগিব। আনহাতে স্পুটনিক Vৰ দুটা ড'জৰ মাজৰ ব্যৱধান ৩সপ্তাহ হ'ব লাগিব।

এই ভেকচিনবোৰ কিমান কাৰ্যকৰী?

এই তিনিওটা ভেকচিনেই যথেষ্ট কাৰ্যকৰী। বিশ্ব স্বাস্থ্য সংস্থাৰ দ্বাৰা নিৰ্ধাৰিত সকলো মাপকাঠি পূৰণ কৰে ভেকচিনকেইটাই। নিদানিক পৰীক্ষণৰ তথ্য এতিয়াও আহি আছে আৰু এই ভেকচিনৰ কাৰ্যকাৰিতা সম্পৰ্কে এতিয়াও নিৰন্তৰ পৰীক্ষা আৰু অধ্যয়ন চলি আছে।

কোভিশ্বিল্ডৰ পৰীক্ষণ বিগত বছৰ নৱেম্বৰত বন্ধ হৈছিল। ইয়াৰ কাৰ্যকৰিতাৰ হাৰ হৈছে ৭০% আৰু ড'জৰ মাজৰ ব্যৱধান বৃদ্ধি কৰিলে ইয়াৰ কাৰ্যকাৰিতাও বৃদ্ধি পাব। এই ভেকচিনে কেৱল গুৰুতৰ লক্ষণবোৰৰ পৰাই ৰক্ষা নকৰে,আৰোগ্য হোৱাৰ সময়ো হ্ৰাস কৰে।

কোভাক্সিনৰ পৰীক্ষণ কেৱল এই বছৰ কৰা হৈছিল। এপ্ৰিলত অহা দ্বিতীয় পৰীক্ষণৰ ফলাফলত, এই ভেকচিনটো ৭৮% কাৰ্যকৰী বুলি কোৱা হৈছিল। গুৰুত্বপূৰ্ণ কথাটো হ'ল যে এই ভেকচিনে গুৰুতৰ লক্ষণ আৰু মৃত্যু বন্ধ কৰাত ১০০% কাৰ্যকৰী। ইপিনে স্পুটনিক V হৈছে এই স্কেলত ভাৰতৰ আটাইতকৈ কাৰ্যকৰী ভেকচিন । স্পুটনিকV হৈছে ৯১.৬%তকৈ অধিক কাৰ্যকাৰিতাৰ হাৰৰ সৈতে আটাইতকৈ কাৰ্যকৰী ভেকচিন।

এই ভেকচিনবোৰৰ মূল্য আৰু ইয়াৰ উপলব্ধতাৰ বিষয়ে-

কোভাক্সিন আৰু কোভিশ্বিল্ড অতি শীঘ্ৰেই মুকলি বজাৰত উপলব্ধ হ'ব। আনকি ৰাজ্য চৰকাৰেও ইয়াক মুকলি বজাৰৰ পৰা ক্ৰয় কৰি ব্যৱহাৰ কৰিব পাৰিব। আশা কৰা হৈছে যে স্পুটনিক Vও শীঘ্ৰেই বজাৰত উপলব্ধ হ'ব।

ভাৰতীয় চিৰাম ইনষ্টিটিউটে চৰকাৰী চিকিৎসালয়ক ইয়াৰ ভেকচিনৰ প্ৰতিটো ড'জ ৩০০ টকাত বিক্ৰী কৰাৰ সিদ্ধান্ত লৈছে আৰু ব্যক্তিগত চিকিৎসালয়বোৰক প্ৰতি ড'জ ৬০০ টকাত বিক্ৰী কৰাৰ সিদ্ধান্ত লৈছে। কিন্তু কোভাক্সিন অলপ ব্যয়বহুল। এই ভেকচিনটো ৰাজ্যবোৰৰ বাবে প্ৰতিটো ড'জ ৪০০ টকাত উপলব্ধ হ'ব আৰু ব্যক্তিগত চিকিৎসালয়সমূহক ইয়াক ১২০০ টকাত বিক্ৰী কৰা হ'ব।

ইপিনে স্পুটনিকV বিকশিত কৰা আৰডিআইএফৰ মুৰব্বী ডিমিট্ৰেভৰ মতে, এই ভেকচিনৰ মূল্য ১০ ডলাৰ অৎ ৭০০ টকা হ'ব। যদিও এই মুহূৰ্তলৈকে সংগঠনটোৱে চৰকাৰ আৰু ব্যক্তিগত চিকিৎসালয়সমূহত ইয়াক কি মূল্যত বিক্ৰী কৰা হ'ব সেই সম্পৰ্কে কোনো তথ্য প্ৰকাশ কৰা নাই। অৱশ্যে, এই ভেকচিনৰ বাবে আপুনি কিমান টকা পৰিশোধ কৰিব লাগিব সেয়া ৰাজ্য আৰু কেন্দ্ৰীয় চৰকাৰৰ নীতিৰ ওপৰতহে নিৰ্ভৰ কৰিব।

নতুন প্ৰকাৰৰ বিপৰীতে এই ভেকচিন কিমান কাৰ্যকৰী?

পৃথিৱীৰ বহু দেশত নতুন মিউটেণ্ট ভাইৰাছৰ প্ৰভাৱ আছে। ব্ৰিটেইনত, ইয়াৰ কেণ্ট ষ্ট্ৰেইন আছে আৰু ভাৰতত পোৱা ডাবল মিউটেণ্ট ষ্ট্ৰেইনৰ লগতে আন কিছুমান দেশত ট্ৰিপল মিউটেণ্ট ভাইৰাছো আছে। ভাইৰাছৰ এই মিউটেণ্টবোৰে বিজ্ঞানীসকলৰ মূৰৰ কামোৰণি বৃদ্ধি কৰিছে। এতিয়ালৈকে দেখা গৈছে যে কোভাক্সিন সকলো প্ৰকাৰৰ সৈতে যুঁজিবলৈ সক্ষম।

কোভিশ্বিল্ড আৰু স্পুটনিক Vৰ ক্ষেত্ৰত, কোনো অধ্যয়নত এনে কোনো দাবী কৰা হোৱা নাই। কিন্তু তথাপিও, বিজ্ঞানীসকলে উপলব্ধ ভেকচিন গ্ৰহণ কৰিবলৈয়ে আহ্বান জনাইছে সকলোকে।

এই ভেকচিনবোৰৰ পাৰ্শ্বক্ৰিয়াবোৰ কেনেধৰণৰ?

তিনিওটা ভেকচিনৰ একে ধৰণৰেই পাৰ্শ্বক্ৰিয়া আছে। এই তিনিওটা হৈছে আন্তঃপেশীৰ ভেকচিন অৰ্থাৎ এই ভেকচিন পেশীৰ গভীৰতালৈ লৈ যায়। ইয়াৰ ফলত বিষ হয় আৰু বেজীয়ে ছাল স্পৰ্শ কৰা ঠাইখিনি ফুলি যায়। মৃদু জ্বৰ, পাতল চৰ্দি আৰু শৰীৰত বিষ সচৰাচৰ হয়। ইয়াৰ দ্বাৰা বিচলিত হোৱাৰ প্ৰয়োজন নাই। চিকিৎসকৰ পৰামৰ্শ অনুসৰি ঔষধ গ্ৰহণ কৰিব।

কোনে এটা নিৰ্দিষ্ট ভেকচিন ল'ব নালাগে আৰু কিয়?

খাদ্য সামগ্ৰীৰ লগতে ঔষধৰ গ্ৰহণৰ ফলত যিকোনো ধৰণৰ এলাৰ্জি হোৱা ব্যক্তিয়ে এই টীকা গ্ৰহণ কৰিব নালাগে। তেওঁলোকে এইক্ষেত্ৰত চিকিৎসকৰ পৰামৰ্শ লোৱা উচিত আৰু তাৰ পিছতহে এই সম্পৰ্কত সিদ্ধান্ত লোৱা উচিত। একেদৰে যদি প্ৰথম ড'জে যদি কিছু জটিলতা আনি দিয়ে, তেন্তে আপুনি দ্বিতীয় ড'জ গ্ৰহণ কৰাৰ পূৰ্বে অপেক্ষা কৰক। চিকিৎসকৰ পৰামৰ্শ লৈহে পৰৱৰ্তী সিদ্ধান্ত গ্ৰহণ কৰক।

লগতে যিসকল লোকে মনোক্ল'নেল এণ্টিবডী লাভ কৰিছে বা প্লাজমা থেৰাপী লাভ কৰিছে, তেওঁলোকেও এতিয়া টীকা লোৱাটো উচিত নহয়। একে সময়তে, যিসকলৰ শৰীৰত কোৰোণা সংক্ৰমণৰ লক্ষণ আছে বা সম্পূৰ্ণৰূপে আৰোগ্য হোৱা নাই, তেওঁলোককো টীকা গ্ৰহণৰ পূৰ্বে অপেক্ষা কৰিবলৈ পৰামৰ্শ দিয়া হৈছে।

কিমান দিনৰ বাবে এই ভেকচিন কাৰ্যকৰী হৈ থাকিব?

সেয়া এতিয়াও ক'ব পৰা হোৱা নাই। এই সকলোবোৰ ভেকচিন খৰখেদাকৈ বিকশিত কৰা হৈছে। সেইবোৰ কেতিয়ালৈকে কাৰ্যকৰী হৈ থাকিব, সেই বিষয়ে কোৱাটো কঠিন। কিন্তু তথাপিও, কিছুমান বিজ্ঞানীয়ে দাবী কৰিছে যে কোৰোণাৰ বিৰুদ্ধে এণ্টিবডী ৯ৰ পৰা ১২মাহৰ বাবে কাৰ্যকৰী হৈ থাকিব, সেয়া নিশ্চিত।

সেয়া যি হ'লেও এই ভেকচিনৰ আটাইতকৈ ভাল দিশটো হ'ল যে এই তিনিওটা ভেকচিনে কোৰোণা ভাইৰাছ সংক্ৰমণৰ বাবেই হোৱা মৃত্যু সম্পূৰ্ণৰূপে বন্ধ কৰাত কাৰ্যকৰী। দুটা ড'জ গ্ৰহণৰ পিছত আপোনাৰ শৰীৰত ইমানেই এণ্টিবডী প্ৰস্তুত কৰা হয় যে সেইবোৰে সংক্ৰমণৰ সৈতে কাৰ্যকৰীভাৱে যুঁজ দিয়ে। যদি আপুনি দুয়োটা ড'জ গ্ৰহণৰ পিছতো সংক্ৰমিত হয়, তেন্তে সেই সময়ত আপোনাৰ ক্ষেত্ৰত স্বাভাৱিক চৰ্দিতকৈ অধিক লক্ষণ দেখা নিদিব।