নৱজাতক পুত্ৰ সন্তানক লৈ চিকিৎসালয়ৰ পৰা ঘৰলৈ উভতিল কৰীণা কাপুৰ খান

চিকিৎসালয়ৰ পৰা ঘৰলৈ আহিবলৈ দিয়া হ’ল কৰীণা কাপুৰ খানক। স্বামী ছেইফ আলী খান, পুত্ৰ টাইমুৰ আলী খান আৰু নৱজাতক পুত্ৰৰ সৈতে ঘৰলৈ ৰাওনা হ'ল কৰীণা।

বলিউদৰ তাৰকা কৰীণা কাপুৰ খানে ২১ ফেব্ৰুৱাৰীত ব্ৰীচ কেণ্ডি হাস্পতালত দ্বিতীয় সন্তানৰ মাতৃত্বৰ গৌৰৱ অৰ্জন কৰে। দ্বিতীয়বাৰৰ বাবে এটি পুত্ৰ সন্তানৰ অভিভাৱকৰ গৌৰৱ অৰ্জন কৰে কৰীণা আৰু ছেইফে। ২০ ফেব্ৰুৱাৰীত চিকিৎসালয়ত ভৰ্তি কৰোৱা হৈছিল কৰীণাক আৰু ২১ ফেব্ৰুৱাৰীত এটি পুত্ৰ সন্তানক জন্ম দিয়ে কৰীণাই।

২১ ফেব্ৰুৱাৰীৰ পৰা চিকিৎসালয়ত দুটাকৈ দিন কটোৱাৰ পিছত কৰীণাক আজি চিকিৎসালয়ৰ পৰা নিজৰ ঘৰলৈ যাবলৈ দিয়া হৈছে। তাৰ পিছতে এনেদৰে ছেইফ-কৰীণাৰ চাৰিজনীয়া পৰিয়ালটোক দেখিবলৈ পোৱা গ'ল গাড়ীত।

কৰীণা কাপুৰ আৰু ছেইফ আলী খানে এটা নতুন ঘৰ ক্ৰয় কৰিছিল আৰু তেওঁলোকৰ দ্বিতীয় সন্তানৰ জন্মৰ আগতে ইয়ালৈ স্থানান্তৰিত হৈছিল। কৰীণা কাপুৰ খান আৰু ছেইফ আলী খানৰ ঘৰত নতুন অতিথিৰ আগমনৰ লগে লগে সমগ্ৰ কাপুৰ আৰু পাটাউদি পৰিয়ালত আনন্দময় পৰিৱেশ দেখিবলৈ পোৱা গৈছে। কৰীণা কাপুৰ খানৰ ডাঙৰ ভগ্নী কৰিশ্মা কাপুৰ আৰু কৰীণাৰ পিতৃ ৰণধীৰ কাপুৰে ছচিয়েল মিডিয়াযোগে আনন্দও প্ৰকাশ কৰিছিল।



মাতৃত্বৰ গৌৰৱৰ মাজতে কৰীণা কাপুৰক আমিৰ খানৰ সৈতে 'লাল সিং চাদ্দা'ত দেখিবলৈ পোৱা  যাব। টম হেক্সৰ হলীউদ ছবি 'ফ্ৰেষ্ট গামপ'ৰ ওপৰত আধাৰিত এই ছবিখন। কৰীণা কাপুৰ খানে লকডাউনৰ পিছতে চণ্ডীগড়ত ছবিখনৰ দৃশ্যগ্ৰহণ শেষ কৰিছিল। তদুপৰি, কৰীণাই তেওঁৰ প্ৰথমখন কিতাপ "কৰীণা কাপুৰ খানছ প্ৰেগনেনচি বাইবেল"ৰ ওপৰত কাম কৰি আছে, যি গৰ্ভৱতী মহিলাসকলৰ বাবে ৰচনা কৰা হৈছে। এই কিতাপখন বছৰৰ শেষলৈ মুকলি কৰা হ'ব।