Kokrajhar News : নিৰ্মাণৰ তিনিদিনৰ পিছতে কোটিটকীয়া পথত ফাট, চকলা–চকলে এৰাই গ’ল পকী পথ

নিৰ্মাণৰ পিছতে বখলা–বখলে এৰাই গ’ল এটা পথ। কোকৰাঝাৰ জিলাৰ অন্তৰ্গত তথা ধুবুৰী জিলাৰ বিলাসীপাৰা পূব বিধানসভা সমষ্টি আৰু কোকৰাঝাৰ জিলাৰ বাওখুংগ্ৰী বিটিচি পৰিষদীয় সমষ্টিৰ অধীনস্থ কেটেঙাঝৰা-মালছিংপাৰা সংযোগী পথৰ ওপৰত থকা পকী দলঙৰ দুয়োপিনে থকা  ২৪০ মিটাৰ এপ্ৰ’চ পথ জহি-খহি যোৱাৰ অভিযোগ।

২০১৯-২০ বিত্তীয় বৰ্ষৰ ৩ কোটি ৩৫ লাখ ৩৩ হাজাৰ ৩১৫ টকা ব্যয় সাপেক্ষে নিৰ্মাণ কৰা হৈছিল এপ্ৰ’চ পথটো৷ এপ্ৰ’চ পথটো নিৰ্মাণৰ দায়িত্ব লাভ কৰিছিল এন কে চৌধুৰী আৰু সুজিত জৈন নামৰ দুই ঠিকাদাৰে৷ কিন্তু মাথোঁ ২৪০ মিটাৰ দৈৰ্ঘ্যৰ পথছোৱাৰ লগতে এপ্ৰ’চ পথ নিৰ্মাণত ঠিকাদাৰে ব্যাপক দুৰ্নীতি সংঘটিত কৰাৰ অভিযোগ কৰিছে স্থানীয় ৰাইজে৷

ৰাইজৰ অভিযোগ এপ্ৰ’চ পথছোৱাৰ নিৰ্মাণ কাৰ্য অতি নিম্নমানৰ হৈছে৷ ফলত পকী এপ্ৰ’চ পথছোৱা এসপ্তাহ আৰু পকীকৰণৰ তিনিদিনৰ পিছতে ছিৰাছিৰকৈ ফাট মেলাৰ লগতে বখলা-বখলে এৰাই গৈছে। তাৰ পৰিপ্ৰেক্ষিত কেটেঙাঝৰা-মালছিংপাৰা সংযোগী এপ্ৰ’চ পথছোৱা পুনৰ নিৰ্মাণৰ দাবীত প্ৰতিবাদী কাৰ্যসূচী ৰূপায়ণ কৰে ৰাইজে৷

কোকৰাঝাৰ জিলাৰ নায়েকগাঁও, মালছিংপাৰা, কেটেঙাঝৰা, বাগছামাৰা, দাৱৰগাঁও, অনুজুলি, ধীৰবিলকে ধৰি অঞ্চলটোৰ প্ৰায় দহখন গাঁৱৰ জনসাধাৰণৰ উপৰি ধুবুৰী জিলাৰ বহলপুৰ, বিলাসীপাৰালৈ যোগাযোগৰ ক্ষেত্ৰত উক্ত পথটোৱে এক গুৰুত্বপূৰ্ণ ভূমিকা গ্ৰহণ কৰি আহিছে৷ সেয়ে উক্ত পথটো পুনৰ নিৰ্মাণ কৰাৰ দাবী তুলিছে স্থানীয় ৰাইজে।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।