Golaghat News: বোকাখাতৰ এক কৰুণ দৃশ্য : ৰীতি-নীতিৰ দোহাই দি মৃতদেহ পেলাই থলে ১১ ঘন্টা

কাজিৰঙা, ৩ জুন: বোকাখাতৰ এক কৰুণ দৃশ্য । সমাজৰ ৰীতি-নীতিৰ দোহাই দি এগৰাকী বিধবা মহিলাৰ মৃতদেহক ৰাইজে সৎকাৰলৈ নিনিয়াকৈ পেলাই ৰাখিলে ১১ ঘন্টা । মৃতকৰ তিনি কন্যা আৰু নাতিনীয়ে মৃতদেহ ডাঙি আনিলে ঘৰৰ বাহিৰলৈ । মৃত্যু হোৱা মহিলাগৰাকীক সৎকাৰ কৰিবলৈ নাহিল কোনো পৰিয়ালৰ লোক অথবা গাঁওবাসী ।

এয়া বোকাখাতৰ বৰচাপৰি বাগিচাৰ ডাঙা লাইনৰ ঘটনা । শুক্ৰবাৰে পুৱা শাৰিৰীক অসুস্থতাত ভুগি থকা বাগিচাখনৰ জয়ন্তী নায়ক নামৰ মহিলাগৰাকীৰ মৃত্যু হয় । কিছুদিনৰ আগতে একমাত্ৰ পুত্ৰ সন্তানৰ মৃত্যু হোৱাৰ পাছত তিনি কন্যা সন্তানৰ সৈতে তেওঁ বাস কৰিছিল বাগিচাখনত ।

শুক্ৰবাৰে পুৱা ৭ বজাত মৃত্যু হোৱা মহিলাগৰাকীক সৎকাৰ কৰিবলৈ সন্ধ্যা পৰ্যন্ত ওলাই নাহিল কোনো লোক । অৱশেষত তিনি কন্যা আৰু এগৰাকী কণমানি নাতিনীয়ে মৃতদেহটো ঘৰৰ ভিতৰৰ পৰা চাঙীত বান্ধি ডাঙি আনে ।

বাগিচাৰ ৰাইজে সমাজৰ ৰীতি-নীতিৰ দোহাই দি নীৰৱ দৰ্শক হৈ মাথো চাই থাকিল । আধুনিক যুগ আৰু বিজ্ঞানৰ চৰম উন্নতিৰ কালতো সমাজৰ কুসংস্কাৰৰ বলি হৈ ৰীতি নীতিক দোহাই দি এগৰাকী মৃতকক ১১ ঘন্টাতকৈ অধিক সময় সৎকাৰ নকৰাকৈ ৰাখি থোৱা ঘটনাই সমগ্ৰ অঞ্চলটোত প্ৰতিক্ৰিয়াৰ সৃষ্টি কৰিছে । অৱশেষত স্থানীয় VDP ৰ সহযোগত মৃতদেহ সৎকাৰৰ ব্যৱস্থা কৰা হয় ।