Monkeypox: দেহত কি কি লক্ষণে দেখা দিলে বুজিব মাংকী পক্সৰ সংক্ৰমণ হৈছে? ই কিমান আশংকাজনক? সবিশেষ জানি লওক

ক’ৰোনা মহামাৰীৰ পিছত মাংকী পক্সে এক আতংকময় পৰিৱেশৰ সৃষ্টি কৰিছে। আমেৰিকা, ইউৰোপ আৰু পশ্চিম আফ্ৰিকাৰ বিভিন্ন অংশত ইতিমধ্যে কেইবাজনো লোক সংক্ৰমিত হৈছে। এইবাৰ ভাৰতৰ স্বাস্থ্য মন্ত্ৰালয়ে মাংকী পক্সৰ (monkeypox) বিষয়ে সতৰ্কবাণী জাৰি কৰিছে।

বিশেষজ্ঞসকলৰ মতে, মাংকী পক্স হৈছে বসন্তৰ দৰে এক ৰোগ। ই এক বিৰল ৰোগ। এই ৰোগটো প্ৰথমবাৰৰ বাবে ১৯৫৮ চনত দেখা গৈছিল। অৱশ্যে, মানুহৰ ক্ষেত্ৰত এই ৰোগৰ সংক্ৰমণ প্ৰথমবাৰৰ বাবে ১৯৭০ চনত দেখা গৈছিল।

বিশেষজ্ঞৰ মতে, মাংকী পক্স তীক্ষ্ণ দাঁত থকা জন্তুৰ দেহত সৰ্বাধিক বিয়পে, যাৰ ভিতৰত আছে নিগনি, কেৰ্কেটুৱা আদি। এনে সংক্ৰমিত জন্তুৰ কামোৰ, আঁচোৰ আৰু আনকি সেইবোৰৰ সংস্পৰ্শলৈ আহিলেও সংক্ৰমণ হ’ব পাৰে। কিন্তু এই ৰোগৰ লক্ষণবোৰ কি? সেইটো জনাটো গুৰুত্বপূৰ্ণ।

মাংকী পক্সৰ লক্ষণ

জ্বৰ, গাৰ বিষ, ডাঙৰ আকাৰৰ বসন্ত ওলোৱাৰ দৰে গুটি বৰ্তমান সময়ৰ বাবে মাংকী পক্সৰ লক্ষণ হিচাপে চিনাক্ত কৰা হৈছে। আনকি আপুনি হাত, ভৰি আৰু মুখমণ্ডলত বিষোৱা অংশ বাঢ়ি থকা দেখিলেও চিকিৎসকৰ পৰামৰ্শ ল’বলৈ দিয়া হৈছে (Monkeypox symptoms appear in the body)।

মাংকী পক্সৰ এই প্ৰকাৰ ইমানেই ভয়ংকৰ যে আক্ৰান্ত লোকৰ ১০%ৰ আনকি মৃত্যুও হ’ব পাৰে। ইয়াৰ উপৰি মূৰৰ বিষ, পেশীৰ বিষৰ সমস্যাবোৰো লক্ষণ হিচাপে দেখা যায়। বিশেষজ্ঞসকলে কৈছে যে মাংকী পক্সৰ সমস্যা দুইৰ পৰা চাৰি সপ্তাহ ধৰি থাকিব পাৰে। অৱশ্যে, এই ৰোগৰ লক্ষণে দেখা দিলে কেইদিনমানৰ পিছত শৰীৰৰ বিভিন্ন অংশলৈ বিয়পিব পাৰে।

কেন্দ্ৰীয় স্বাস্থ্য মন্ত্ৰী মনসুখ মাণ্ডভিয়াই ৰাষ্ট্ৰীয় ৰোগ নিয়ন্ত্ৰণ কেন্দ্ৰ আৰু ভাৰতীয় চিকিৎসা গৱেষণা পৰিষদক দেশত মাৰাত্মক ভাইৰাছ মাংকী পক্স যাতে বিয়পি নপৰে, তাৰ বাবে নিৰ্দেশ দিছে। ইয়াৰ উপৰি স্বাস্থ্য মন্ত্ৰালয়ে বিভিন্ন বিমানবন্দৰ আৰু বন্দৰ বিষয়াসকলক বিষয়টো নিৰীক্ষণ কৰিবলৈও কৈছে।