Abortion: বৈধ নেকি গৰ্ভপাত? এই ক্ষেত্ৰত কি কি নিয়ম মানি চলাতো জৰুৰী, জানক সবিশেষ

গৰ্ভপাত নৈতিক ভাবে কিমান দূৰ সন্মত, তাকে লৈ যুক্তি আৰু তৰ্ক কেতিয়াও শেষ নহয়। কোনোৱে ইয়াক ব্যক্তিস্বাধীনতাৰ অধিকাৰৰ মৰ্যদা দিয়ে, আনহাতে একাংশৰ মতে, বিষয়টি অনৈতিক কাৰ্যকলাপৰ সৈতে সম্পৰ্কীত। কিন্তু ভাৰত চৰকাৰৰ এই বিষয়ত নিৰ্দিষ্ট কিছু বক্তব্য আৰু আইন আছে যি প্ৰসূতিৰ স্বাস্থ্যৰ দিশটোৰ প্ৰতি লক্ষ্য ৰাখি দেশত প্ৰয়োগ কৰা হৈছে। এই সন্দৰ্ভত বিশদভাবে জনাইছে উচ্চতম ন্যায়ালয়ৰ আইনজীৱি প্ৰাচী মিশ্ৰই।

গৰ্ভপাত কি?

গৰ্ভাৱস্থা বিনষ্ট কৰাৰ পদ্ধতিকেই কোৱা হয় গৰ্ভপাত বা এবৰ্শ্যন।

ভাৰতীয় আইনৰ দ্বাৰা কি গৰ্ভপাত বৈধ বা স্বীকৃত? হয়, দেশৰ আইন চিকিৎসাগত প্ৰয়োজনীয়তাই চিকিৎসকৰ প্ৰেচক্ৰিপশ্যনৰ ভিত্তিত গৰ্ভপাতক স্বীকৃতি দিছে।

কোন সময়ৰ গৰ্ভপাত চিকিৎসকৰ সহায়ৰ ভিত্তিত আইনসন্মত ভাবে কৰিব পৰা যায়?

১. গৰ্ভাৱস্থাৰ ২০ সপ্তাহৰ কম হ'লে চিকিৎসকৰ পৰামৰ্শ আৰু সহায়ত গৰ্ভপাত কৰিব পৰা য়ায়। এইক্ষেত্ৰত এজন চিকিৎসকৰ উপস্থিতিয়েই যথেষ্ট।

২. যদি গৰ্ভাৱস্থাৰ ২০ সপ্তাহ অতিক্ৰম কৰিছে, কিন্তু ২৪ সপ্তাহৰ মাজত আছে, সেইক্ষেত্ৰতো চিকিৎসকৰ পৰামৰ্শ আৰু সহায়ত গৰ্ভপাত কৰিব পৰা যায়। কিন্তু এই ক্ষেত্ৰত দুজন চিকিৎসকৰ উপস্থিতি বাধ্যতামূলক।

১৮ বছৰৰ তলৰ গৰ্ভৱতীয়ে গৰ্ভপাত কৰিব পাৰিবনে? ১৮ বছৰৰ তলৰ গৰ্ভপাতো আইনৰ অনুমোদন অনুসৰি বৈধ। এই ক্ষেত্ৰত প্ৰসূতিৰ অভিভাৱকৰ অনুমতিৰ প্ৰয়োজন।