Chain marketing systemৰ দৰেই সৰুপথাৰত চলিছে ড্ৰাগছৰ ৰমৰমীয়া বেহা, আৰক্ষীৰ অভিযানত ড্ৰাগছসহ ধৰা পৰিল ড্ৰাগছ সৰবৰাহকাৰী ।

মাৰাত্মক ড্ৰাগছৰ বিৰুদ্ধে সমগ্ৰ ৰাজ্যৰ লগতে অসম নাগালেণ্ড সীমান্তৱৰ্তী সৰুপথাৰতো আৰক্ষীয়ে অভিযান আৰম্ভ কৰিছে ৷ বুধবাৰে নিশা ধনশিৰি মহকুমা আৰক্ষী বিষয়াৰ নেতৃত্বত আৰু সৰুপথাৰ থানাৰ ভাৰপ্ৰাপ্ত বিষয়াৰ অভিযানত ১ নং পদুমণি গাঁৱৰ পৰা বেণুধৰ গগৈ নামৰ এজন ড্ৰাগছ সৰবৰাহকাৰীক আটক কৰাৰ লগতে সন্দেহযুক্ত হেৰ'ইন উদ্ধাৰ কৰে ৷ ইতিমধ্যে সৰুপথাৰ আৰক্ষীয়ে বেণুধৰ গগৈক আতক কৰি আৰম্ভ কৰিছে জোৰদাৰ তদন্ত।

আজি দুপৰীয়া ছেৱাগুৰি মাজুলীচূক অঞ্চলত আন এজন ড্ৰাগছৰ ব্যৱসায়ীৰ সন্ধানত সৰুপথাৰ আৰক্ষী থানাৰ ভাৰপ্ৰাপ্ত আৰক্ষী বিষয়াৰ নেতৃত্বত পুনৰ আন এক অভিযান আৰম্ভ কৰে। কিন্তু আৰক্ষী অহাৰ উমান পাই ড্ৰাগছ ব্যৱসায়ীজন পলাবলৈ চেষ্টা কৰে। কিন্তু ৰাইজে চম্পক গগৈক নামৰ ড্ৰাগছ ব্যৱসায়ী যুৱকজনক ড্ৰাগছসহ কৰায়ত্ত কৰি আৰক্ষীক গতাই দিয়ে । চম্পক গগৈ পূর্বেও ড্ৰাগছ সৰবৰাহৰ গোচৰত জেললৈ গৈ জামিনত মুক্ত হৈ পুনৰ আৰম্ভ কৰিছিল ড্ৰাগছৰ ব্যৱসায় । ৰাইজে ধৰি আৰক্ষীক গতাই দিয়া চম্পক গগৈৰ পৰা ১.৭ গ্ৰাম ওজনৰ ড্ৰাগছৰ লগতে ড্ৰাগছ সেৱন কৰিবলৈ ব্যৱহাৰ কৰা সামগ্ৰী উদ্ধাৰ কৰিবলৈ সক্ষম হয় আৰক্ষী ।

উল্লেখযোগ্য যে, চম্পক গগৈ আৰু বেনুধৰ গগৈৰ পৰা আৰক্ষীয়ে বহুকেইটা গুৰুত্বপূৰ্ণ তথ্য লাভ কৰিছে । এই ড্ৰাগছ ব্যৱসায়ৰ লগত এক বৃহত চক্ৰ জড়িত থকাৰ সন্দেহ প্ৰকাশ কৰিছে আৰক্ষীয়ে ৷ তাৎপর্যপূর্ণ কথা এই যে সৰুপথাৰৰ লগতে সমগ্ৰ ধনশিৰি মহকুমাতে চুবুৰীয়া নাগালেণ্ডৰ ডিমাপুৰৰ এক শক্তিশালী চক্ৰই এই ড্ৰাগছৰ বজাৰখন নিয়ন্ত্ৰণ কৰি আহিছে। তদুপৰি চেইন মাৰ্কেটং ছিষ্টেমত চলে এই ড্ৰাগছৰ ব্যৱসায়। প্ৰথমে ড্ৰাগছ আসক্ত যুৱকসকলকেই পিছলৈ ড্ৰাগছ সৰবৰাহত জড়িত কৰে এই চক্ৰটোৱে। প্ৰথমে ড্ৰাগছ আসক্ত যুৱকসকল লাহে লাহে এই ড্ৰাগছৰ ব্যৱসায়ত জড়িত হৈ পৰে আৰু নিজ নিজ অঞ্চলত ড্ৰাগছৰ ব্যৱসায় আৰম্ভ কৰে। তদুপৰি তেওঁলোকে নিজৰ অঞ্চলৰ বহু যুৱক-যুৱতীক এই মাৰাত্মক ড্ৰাগছৰ আসক্তিৰ মাজলৈ ঠেলি দিয়ে। সেয়েহে অতি দ্ৰুত গতিত বৃদ্ধি পাইছে এই ড্ৰাগছৰ ব্যৱসায়। যদি আৰক্ষী প্ৰশাসনে এই ড্ৰাগছৰ ব্যৱসায় বন্ধ কৰিবলৈ সক্ষম নহয়, তেনেহলে অনাগত দিনত এই ড্ৰাগছৰ গ্ৰাসত পৰি বহু যুৱক-যুৱতী ধ্বংস হ'ব বুলি আশংকা কৰিছে ৰাইজে।