Pig Lead to a Murder in Mushalpur : গাহৰিৰ কাৰণে ভয়ংকৰ কাজিয়া, ঘপিয়াই হত্যা এজনক!

বাক্সাত এটা গাহৰিক কেন্দ্ৰ কৰি সংঘটিত হৈছে এটা চাঞ্চল্যকৰ হত্যাকাণ্ড ৷ দাৰ ঘাপত কৰুণ মৃত্যুক আকোৱালী লয় বীৰেন বসুমতাৰী নামৰ এজন লোকে ৷ আহত হয় বীৰেন বসুমতাৰীৰ পত্নী দিপালী বসুমতাৰীও ৷ বাক্সাৰ আঠিয়াবাৰী আৰক্ষী চকীৰ অন্তৰ্গত বৰমচাৰীত সংঘটিত হৈছে এই ঘটনা ৷ ঘটনা সন্দৰ্ভত ইতিমধ্যে দুজনক আটক কৰিছে  আৰক্ষীয়ে ৷

জানিব পৰা মতে বৃহস্পতিবাৰে মৃত্যু হোৱা বীৰেন বসুমতাৰীৰ খেতিত চুবুৰীয়া নৃপেন দৈমাৰীৰ পোহনীয়া গাহৰি এটাই প্ৰৱেশ কৰি কিছু পৰিমাণে খেতিৰ অনিষ্ট সাধন কৰিছিল ৷ খেতি অনিষ্ট কৰাত বীৰেন বসুমতাৰীয়ে দাৰে গাহৰিটো আক্ৰমণ কৰাত নৃপেন দৈমাৰীৰ সৈতে সৃষ্টি হৈছিল কাজিয়াৰ ৷ পিছত সেই কাজিয়াই চূড়ান্ত ৰূপ লোৱাত নৃপেন দৈমাৰী আৰু তেওঁৰ ভাতৃ পত্নেশ্বৰ দৈমাৰীয়ে আক্ৰমণ কৰে বীৰেন বসুমতাৰী আৰু পত্নী দিপালী বসুমতাৰীক ৷

আক্ৰমণৰ ফলত ঠাইতে মৃত্যুক আকোৱালী লয় বীৰেন বসুমতাৰীয়ে ৷ আনহাতে আহত পত্নী দিপালী পলাই সাৰে ৷ সম্প্ৰতি মুছলপুৰ অসামৰিক চিকিৎসালয়ত চিকিৎসাধীন হৈ আছে আহত দিপালী বসুমতাৰী ৷

পিছত ঘটনাৰ বিষয়ে জানিব পাৰি বৰমচাৰীত উপস্থিত হয় আঠিয়াবাৰী আৰক্ষী ৷ আৰক্ষীয়ে লগে লগে আটক কৰে হত্যাকাৰী দুই ভাতৃ ক্ৰমে নৃপেন দৈমাৰী আৰু পত্নেশ্বৰ দৈমাৰীক ৷ আৰক্ষীয়ে পিচত মৃতদেহটো মুছলপুৰস্থ ডা৹ ৰবি বড়ো অসামৰিক চিকিৎসালয়লৈ মৰণোত্তৰ পৰীক্ষাৰ বাবে প্ৰেৰণ কৰে  আৰু হত্যাকাৰী দুই ভাতৃক জিলা ন্যায়াধীশৰ আদালতত হাজিৰ কৰোৱায় ৷  সম্প্ৰতি ঘটনাটোক লৈ সমগ্ৰ আঠিয়াবাৰী অঞ্চলতে চাঞ্চল্যৰ সৃষ্টি কৰিছে ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।