PDS Rice Scam : বৰপেটাত চাউল চোৰ মুক্তাৰ হুছেইনৰ আত্মসমৰ্পণ, বাংলাদেশলৈ চোৰাংকৈ নিয়ে সুলভ মূল্যৰ চাউল

বৰপেটাৰ উত্তৰ বগুৰিবাৰী সমবায় সমিতিৰ পলাতক সম্পাদক মুক্তাৰ হুছেইনে অৱশেষত আত্মসমৰ্প কৰিলে ৷ বৰপেটাৰ মুখ্য ন্যায়িক দণ্ডাধীশৰ আদালতত আত্মসমৰ্পণ কৰে মুক্তাৰে ৷ আজি বিয়লি আদালতত আত্মসমৰ্পণ কৰা মুক্তাৰ হুছেইনক ৫ দিনৰ আৰক্ষী জিম্মালে দিয়া হৈছে।

ৰাজহুৱা বিতৰণ ব্যৱস্থাৰ চাউল কেলেংকাৰীৰ সৈতে জৰিত মুক্তাৰ হুছেইনক সোমবাৰৰ পৰাই অৰ্থনৈতিক অপৰাধ অনুসন্ধান সংস্থাৰ তদন্তকাৰী বিষয়াই বিচাৰি আছিল ৷ পলাতক অৱস্থাত থকা মুক্তাৰ হুছেইনৰ সন্ধান নাপাই অৰ্থনৈতিক অপৰাধ অনুসন্ধান সংস্থাৰ তদন্তকাৰী দল বহৰিৰ পৰা শুদাহাতে উভতিবলগীয়া হৈছিল ৷

উল্লেখ্য যে, ৰাজহুৱা বিতৰণ ব্যৱস্থাৰ চাউল চুৰিৰ সৈতে জৰিত থকাৰ অভিযোগত শুকুৰবাৰৰ পৰাই পলাতক অৱস্থাত আছিল সম্পাদক মুক্তাৰ ৷ উত্তৰ বগুৰিবাৰী সমবায়ৰ লগতে আজাদ সমবায়ৰো ভাৰপ্ৰাপ্ত সম্পাদকৰ দায়িত্বত থকা মুক্তাৰ হুছেইনৰ গ্ৰেপ্তাৰৰ পিছতে বৰপেটাৰ পৰা বাংলাদেশলৈ চাউল সৰবৰাহ সম্পৰ্কে বহু কথা পোহৰলৈ অহাৰ সম্ভাৱনা আছে ৷