হাস্পতালত সাৱধানে থাকক! কোৰোণা ৰোগীৰ ৰূপত হাস্পতালত সোমাই থাকিব পাৰে চোৰ!

হোজাই নীলবাগান কোভিড হাস্পতালৰ পৰা কোভিড আক্ৰান্ত ৰোগীয়ে অন্য ৰোগীৰ মোবাইল, নগদ ধন চুৰি কৰি পলায়ন কৰা ঘটনাই চাঞ্চল্যৰ সৃষ্টি কৰিছে। আৰক্ষীয়ে কোভিড আক্ৰান্ত ৰোগীজনক বিচাৰি হাবাথুৰি খাই ফুৰিব লগা হৈছে। কোভিড আক্ৰান্ত ৰোগী জন ভুৱা ঠিকনাৰে ভৰ্তি হৈছিল হস্পাতালত।

নীলবাগান কোভিড হাস্পতালৰ পৰা শনিবাৰে নিশা পলায়ন কৰে কোভিড আক্ৰান্ত ৰোগী চোৰটোৱে হাস্পতালৰ সীমাৰ পিছফালে থকা বেৰ ভাঙি পলায়ন কৰে৷ । পলায়ন কৰা ৰোগী চোৰটো হোজাই কৃষ্ণনগৰৰ অশোক দাস বুলি চিকিৎসালয় কৰ্তৃপক্ষই সদৰি কৰিছে৷

অশোক দাস দুদিন পূৰ্বে কোৰোণাত আক্ৰান্ত হৈ ভৰ্তি হৈছিল কোভিড চিকিৎসালয়খনত ৷ কোভিড হাস্পতালৰ একাংশ চিকিৎসক আৰু স্বাস্থ্যকৰ্মীয়ে এই ঘটনা গাপ দিয়াৰ চেষ্টা কৰে যদিও একাংশ সাংবাদিকৰ তৎপৰতাত ৰোগীজন চিকিৎসালয়ৰ পৰা পলায়ন কৰা কথাটো অৱশেষত স্বীকাৰ কৰে৷ ঘটনা সন্দৰ্ভত মোৰাঝাৰ আৰক্ষী থানাত সেই সময়ত কৰ্তব্যৰত চিকিৎসক সুহাদা লুতফাই এখন এজাহাৰ দাখিল কৰিছে ৷

মোৰাঝাৰ আৰক্ষী ঘটনাস্থলীত উপস্থিত হৈ আৰম্ভ কৰিছে তদন্ত৷ কিন্তু হাস্পতালত ৰোগী চোৰটোক ভৰ্তি কৰা সময়ত সঠিক তথ্য লিপিৱদ্ধ নকৰাত আৰক্ষীয়েও কোনো শুংসুত্ৰ লাভ কৰিবলৈ সমৰ্থ হোৱা নাই।

আনফালে কোভিড আক্ৰান্ত চোৰটো পলায়ন কৰাত গণ সংক্ৰমণৰ আশংকাত আতংকিত হৈ পৰিছে স্থানীয় ৰাইজ৷