Funeral Turns Super Spreader : অন্ত্যষ্টিক্ৰিয়াত অংশ লোৱাৰ পিছতে এখন গাঁৱত কোৰোণাৰ গণ সংক্ৰমণ। পলাই যোৱা কোৰোণা ৰোগীক ধৰি ধৰি নিলে হাস্পতাললৈ।

দুধনৈৰ এখন গাঁৱতে ১৮ গৰাকী পুৰুষ মহিলাৰ দেহত ধৰা পৰিল কোৰোণা ৷ এক অন্ত্যষ্টিক্ৰিয়া অনুষ্ঠানত অংশগ্ৰহণ কৰাৰ পিচতে গাঁৱখনত বৃদ্ধি পালে সংক্ৰমণ! তাৰ মাজতে আন এক অনাকাংক্ষিত ঘটনা সংঘটিত হ’ল গাঁওখনত । ৰোগী সকলক নিবলৈ এম্বুলেন্স অহাৰ সময়তে সেই ঠাইৰ পৰা দৌৰি পলায়ন কৰে ১৮ গৰাকী পজিটিভ ৰোগীয়ে ৷ অৱশেষত আৰক্ষীৰ তৎপৰতাত আটাইকেইগৰাকীকে ভৰ্তি কৰোৱা হ’ল চিকিৎসালয়ত ৷

স্বাস্থ্য বিভাগে গাঁৱখনত ৯৭ গৰাকী লোকৰ টেষ্ট কৰায় আৰু তাৰ ভিতৰত ১৮ গৰাকী লোকৰ দেহত ধৰা পৰে কোৰোণা ৷ বাখ্ৰাপুল গাঁৱৰ ৰাজহুৱা স্থানত গাঁওবাসীৰ কৰোৱা হয় ক’ভিড টেষ্ট। তাৰ পিচতে পজিটিভ ৰোগী সকলক কিছু নিলগত ৰখা হয যদিও এম্বুলেন্স অহাৰ লগে-লগে আটাইকেইগৰাকী পজিটিভ ৰোগীয়ে উক্ত স্থানৰ পৰা পলাই যায়। লগে-লগে হুৱা-দুৱা লাগে অঞ্চলটোত ৷ শেষত আৰক্ষী আৰু গাঁৱবুঢ়াৰ সহযোগত পলায়ন কৰা ৰোগী সকলক উভতাই অনা হয় আৰু এম্বুলেন্সেৰে ধূপধৰাত থকা কোভিড চেণ্টাৰলৈ নিয়া হয় ৷

ইফালে এখন গাঁৱত এদিনতে ১৮ জন লোক আক্ৰান্ত হোৱাৰ বাতৰিয়ে সাধাৰণতে চিন্তিত কৰিছে দুধনৈবাসীক। জানিব পৰা মতে, এই বাখ্ৰাপুল গাঁৱত কিছুদিন পূৰ্বে কোৰোণাত আক্ৰান্ত হৈ মৃত্যু হৈছিল এজন লোকৰ ৷ মৃত্যু হোৱা লোকজনৰ অন্ত্যষ্টিক্ৰিয়া অনুষ্ঠানত গাঁৱখনৰ বহুলোকে ভিৰ কৰিছিল আৰু তাৰ পিচতে  ১৮ গৰাকী ক’ৰোনা পজিটিভ হয়। দুধনৈৰ অকল বাখ্ৰপুলতে নহয় দুধনৈ চিকিৎসালয়তো ১২ গৰাকী পজিটিভ ৰোগী চিনাক্ত হয় ৷ এটা দিনত এখন ঠাইত ৩০ গৰাকী পজিটিভ হোৱা পিচত এতিয়া একপ্ৰকাৰ আতংকিত হৈ পৰিছে দুধনৈবাসী ৷