বলীউদত নিৰ্মাণ হ’ব ক’ৰোণা ভাইৰাছক লৈ ছবি; নাম ‘ক’ৰোণা প্যাৰ হে’ 

ক’ৰোণা ভাইৰাছে সমগ্ৰ বিশ্বতে ত্ৰাসৰ সৃষ্টি কৰাৰ সময়তে এইবাৰ  বলীউদৰ ছবি পৰিচালক সাজু হৈছে ক’ৰোণা ভাইৰাছৰ ওচৰত ছবি নিৰ্মাণ কৰিবলৈ। ইতিমধ্যে ঠিক কৰা হৈছে ছবিৰ নাম। ‘Eros International’ নামৰ ছবি নিৰ্মাণ প্ৰতিষ্ঠানটোৱে পঞ্জীয়ন কৰিছে এখন ছবিৰ নাম।

‘Indian Motion Picture Producers Association’ত প্ৰতিষ্ঠানটোৱে পঞ্জীয়ন কৰা নামটো হৈছে “ক’ৰোণা প্যাৰ হে।“ প্ৰতিষ্ঠানটোত কৰ্মৰত এজন বিষয়াৰ মতে ইতিমধ্যে কাহিনী, চিত্ৰনাট্যৰ কাম আৰম্ভ হৈছে । ক’ৰোণা ভাইৰাছৰ আতংক শেষ হোৱাৰ পাছতে আৰম্ভ হ’ব ছবিখনৰ চিত্ৰগ্ৰহণৰ কাম । অৱশ্যে চলচিত্ৰখনৰ মুখ্য চৰিত্ৰত কোনে অভিনয় কৰিব সেয়া এতিয়ালৈকে ঠিক কৰা নাই ছবি নিৰ্মাণ প্ৰতিষ্ঠানটোৱে। ক'ৰোণা ভাইৰাছৰ আতংকৰ পটভূমিত এটা প্ৰেম কাহিনী উপস্থাপন কৰা হ’ব ছবিখনত।

নিৰ্মাণ হ’ব ‘Deadly Corona’ নামৰ আন এখন ছবি । এই নামৰো আৱেদন লাভ কৰিছে ‘Indian Motion Pictures Producers Association’এ। এই ছবিখনৰ নিৰ্মাতা কোন সেই কথা এতিয়ালৈকে গম পোৱা হোৱা নাই।

আনহাতে দেশৰ বিভিন্ন ৰাজ্যৰ ছবিগৃহসমূহ বন্ধ কৰি দিয়াৰ ফলত চলচিত্ৰ উদ্যোগে অভাৱনীয় লোকচানৰ সন্মুখীন হৈছে । ইৰফান খান অভিনীত Angrezi Medium নামৰ ছবি খন যোৱা ১৩ তাৰিখে ছবিগৃহলৈ আহিছিল যদিও তাৰ পাছতে ছবিগৃহ সমূহ বন্ধ হৈ যোৱাত নিৰ্মাতাই ক’ৰোণা আতংকৰ অন্তত ছবি খন পুনৰ মুক্তি দিয়াৰ চিন্তা চর্চা কৰি আছে। অক্ষয় কুমাৰ অভিনীত সূৰ্যবংশীৰ মুক্তিৰ দিন অনির্দিষ্ট কাললৈ পিছুৱাই দিয়া হৈছে।