কোৰোণাৰ ত্ৰাসৰ মাজতেই ভাৰতীয় ৰে’ল কৰ্তৃপক্ষই চলাব অক্সিজেন এক্সপ্ৰেছ ৰে’ল ! সেউজ কৰিড'ৰৰ জৰিয়তে যোগান ধৰিব অক্সিজেন!

কোৰোণা ভাইৰাছৰ দ্বিতীয় ঢৌৱে সমগ্ৰ দেশ জোকাৰি থকাৰ লগতে প্ৰতিদিনে দ্ৰুত হাৰত বৃদ্ধি পাইছে সংক্ৰমণৰ ঘটনা ৷ কোৰোণা ভাইৰাছৰ ঘটনা বৃদ্ধিৰ লগে লগে বহু ৰাজ্যই এতিয়া অক্সিজেনৰ অভাৱৰো সন্মুখীন হ’বলগীয়া হৈছে । ফলত এতিয়া ভাৰতীয় ৰে'ল কৰ্তৃপক্ষই অক্সিজেন এক্সপ্ৰেছ ৰে’ল (Oxygen Express Trains) চলোৱাৰ সিদ্ধান্ত হাতত লৈছে । এই ৰে’লসমূহৰ বাবে সেউজ কৰিডৰ নিৰ্মাণ কৰি থকা হৈছে ।

ৰে'ল মন্ত্ৰালয়ে এক বিবৃতিযোগে অক্সিজেন এক্সপ্ৰেছৰ সিদ্ধান্তৰ বিষয়ে জাৰি কৰিছে সকলো কথা । ৰে'লৱে কৰ্তৃপক্ষই জনায় যে কাৰিকৰী পৰীক্ষণৰ পিছত মহাৰাষ্ট্ৰৰ ৰে'ল ষ্টেচনৰ পৰা ভাইজাগ, জামছেদপুৰ, ৰাউৰকেলা, বোকাৰোলৈ খালী টেংকাৰ প্ৰেৰণ কৰা হ'ব । এই স্থানবোৰত লিকুইড মেডিকেল অক্সিজেন (LMO) টেংকাৰত ভৰোৱা হ'ব আৰু ইয়াৰ পিছত অক্সিজেন এক্সপ্ৰেছ ৰে’ল যোগে ইয়াক গন্তব্যস্থানলৈ লৈ যোৱা হ'ব । মহাৰাষ্ট্ৰ আৰু মধ্য প্ৰদেশ চৰকাৰৰ অনুৰোধৰ পিছতেই এই সিদ্ধান্ত গ্ৰহণ কৰিছে ৰে'লৱে কৰ্তৃপক্ষই ।

আনহাতে, ৰে'লমন্ত্ৰী পীয়ুষ গোৱেলে জনায় যে দিল্লীৰ শকুৰবস্তি ষ্টেচনত ৮০০ খন বিচনাযুক্ত ৫০ টা কোভিদ-১৯ টা আইচলেচন ডবা সাজু হৈ আছে । একেদৰে, আনন্দ বিহাৰ ষ্টেচনতো কোৰোণা ৰোগীৰ বাবে ২৫ টা ডবা উপলব্ধ হ'ব । ৰাজ্যসমূহৰ চাহিদা অনুসৰি সমগ্ৰ দেশতে ৩ লাখতকৈও অধিক আইচলেচন বিচনা ব্যৱস্থা কৰিব পাৰিব বুলিও অৱগত কৰে ৰে'লৱে কৰ্তৃপক্ষই ৷

উল্লেখ্য যে, বিগত বছৰ মাত্ৰ কেইটামান দিনৰ বাবেহে ২০০ টা ডবাৰহে ব্যৱস্থা কৰিব পৰা গৈছিল । পূৱ উত্তৰ প্ৰদেশৰ মৌ, বিহাৰৰ ভাগলপুৰ, দিল্লীৰ শকুৰবস্তি আৰু আনন্দ বিহাৰৰ দৰে ষ্টেচনতহে এই ডবা মোতায়েন কৰা হৈছিল । লগতে কিছুমান ঠাইত ইয়াৰ ব্যৱহাৰ কৰা হৈছিল। যদিও সেই সময়ত অধিক কোভিদ ডবাৰ ব্যৱহাৰ কৰা হোৱা নাছিল ।