মেট্ৰিক, উচ্চতৰ মাধ্যমিকত শীর্ষ স্থান প্ৰদানৰ ব্যৱস্থা বন্ধ কৰাৰ পৰামৰ্শ কমিটীৰ; বিদ্যালয়ৰ সামগ্ৰীক ফলাফলৰ ভিত্তিত মুল্যাংকনৰ পোষকতা

অসমৰ স্কুলীয়া শিক্ষা ব্যৱস্থা (Assam Education System)ত আমূল পৰিবৰ্তন সাধিবলৈ কেইবাটাও যুগান্তকাৰী পৰামৰ্শ প্ৰদান কৰিছে ৰাজ্য চৰকাৰে গঠন কৰি দিয়া কমিটীয়ে । কমিটীখনে উচ্চ মাধ্যমিক (HSLC) আৰু উচ্চতৰ মাধ্যমিক (HS)ৰ চূড়ান্ত পৰীক্ষাত ৰাজ্যৰ ভিতৰত শীৰ্ষ স্থান দখল কৰা পৰীক্ষাৰ্থীৰ তালিকা জাৰী কৰাৰ ব্যৱস্থা পৰিহাৰ কৰিবলৈ পৰামৰ্শ আগবঢ়াইছে । কমিটীখনে লগতে ভূগোল (Geography) আৰু বুৰঞ্জী (History) বিষয় হিচাপে বিভিন্ন পৰ্যায়ত অন্তৰ্ভুক্ত কৰাৰ পোষকতা কৰিছে ।

কমিটীখনে ছাত্ৰ ছাত্ৰী সকলক ব্যক্তিগতভাৱে শীর্ষ স্থান দিয়াৰ বিপৰীতে বিদ্যালয়সমূহৰ সামগ্ৰীক ফলাফলৰ ভিত্তিত মুল্যাংকন (Evaluation) কৰাৰ পোষকতা কৰিছে । এনে কৰিলে চৰকাৰী আৰু ব্যক্তিগত খণ্ডৰ বিদ্যালয়সমূহৰ মাজত সকলো শিক্ষাৰ্থীৰ ভাল ফলাফল প্ৰদৰ্শনৰ প্ৰচেষ্টাৰে এটা সুস্থ প্ৰতিযোগিতাৰ পৰিৱেশৰ সূচনা হ’ব বুলি উল্লেখ কৰা হৈছে কমিটীৰ প্ৰতিবেদনত । লগতে বুৰঞ্জী আৰু ভূগোল বিভিন্ন পৰ্যায়ত অধিক অন্তৰ্ভুক্ত কৰাৰো পৰামৰ্শ দিছে চৰকাৰী কমিটীখনে ।

ইয়াৰ লগতে বিদ্যালয় সমূহক আন কিছু কাৰ্যাৱলীৰ ভিত্তিত মূল্যাংকন কৰাৰ পৰামৰ্শ আগবঢ়োৱা হৈছে । উদ্ভাৱনী চিন্তাৰ সূচনা, পাঠ্যপুথিৰ অতিৰিক্ত বিষয়বস্তুত ছাত্ৰ-ছাত্ৰীক জড়িত কৰা আদিৰ ভিত্তিত বিদ্যালয়সমূহ মূল্যায়ন কৰাৰ পৰামৰ্শ প্ৰদান কৰা হৈছে।
অন্যহাতে, পাঠ্যক্ৰমত সৰ্বাধিক বিষয় সন্নিবিষ্ট কৰি ছাত্ৰ-ছাত্ৰীক বিষয় বাচনিত অধিক স্বতন্ত্ৰতা প্রদানৰো পৰামৰ্শ দিছে কমিটীখনে । ডিজিটেল মাধ্যমত পাঠদানে (Digital Education)ৰে ছাত্ৰ-ছাত্ৰীক জড়িত কৰাটো বিচাৰিছে কমিটীয়ে ।

পৰিৱৰ্তিত সামাজিক প্ৰেক্ষাপটত ছাত্ৰ-ছাত্ৰী সকলৰ মাজত উদ্যমিতা বিকাশৰ মনষ্কতা গঢ়ি তুলিবলৈ পৰামৰ্শ প্রদান কৰিছে কমিটীখনে । বিদ্যালয়সমূহে শিক্ষাৰ্থীয়ে লৈ অহা জন্মসিদ্ধ মেধা (Born Talent) চিনাক্ত কৰি সেইধৰণৰে বাট দেখুৱাই লৈ যোৱাৰ দায়িত্ব পালন কৰিব লাগে বুলিও উল্লেখ কৰা হয় প্ৰতিবেদনত । ইয়াৰ কাৰণে দিনে এটা হলেও তেনে ধৰণৰ শ্ৰেণী সংযোজন কৰাৰ পৰামৰ্শ প্ৰদান কৰে কমিটীখনে ।