এন আই‌ টি শিলচৰৰ নতুন স্থায়ী সঞ্চালক হিচাপে দায়িত্ব ল'লে অধ্যাপক দিলীপ কুমাৰ বৈদ্যই

শিলচৰ, ২৩ মে: এন আই টি শিলচৰৰ নতুন স্থায়ী সঞ্চালক হিচাপে নেছনেল ইনষ্টিটিউট অফ টেকনলজি খৰগপুৰৰ সঞ্চালক অধ্যাপক ড° দিলীপ কুমাৰ বৈদ্যই দায়িত্ব ল’লে । সোমবাৰে এন আই টি শিলচৰৰ ভাৰপ্ৰাপ্ত সঞ্চালক ৰজত গুপ্তাই অধ্যাপক দিলীপ কুমাৰ বৈদ্যক দায়িত্ব অৰ্পণ কৰে ।

অধ্যাপক বৈদ্য খৰগপুৰ ভাৰতীয় প্ৰযুক্তি প্ৰতিষ্ঠানৰ চিভিল ইঞ্জিনিয়াৰিং বিভাগৰ অধ্যক্ষ আৰু ৰণবীৰ আৰু চিত্ৰ গুপ্ত স্কুল অৱ ইনফ্ৰাষ্ট্ৰাকচাৰ ডিজাইন এণ্ড মেনেজমেণ্টৰ অধ্যাপক আৰু মুৰব্বী আছিল । ১৯৯৪ চনত আই আই টি খড়গপুৰত যোগদান কৰি ২০০৮ চনৰ পৰা চিভিল ইঞ্জিনিয়াৰিঙৰ অধ্যাপক হিচাপে কাৰ্যনিৰ্বাহ কৰি আহিছে ।

১৯৮৭ চনত বেংগল ইঞ্জিনিয়াৰিং কলেজৰ (বৰ্তমান আই আই ই এছ টি)ৰ পৰা চিভিল ইঞ্জিনিয়াৰিঙত স্নাতক ডিগ্ৰী লাভ কৰি ১৯৮৯ আৰু ১৯৯৩ চনত আই আই এছ চি বাংগালুৰুৰ পৰা এম ই আৰু পি এইচ ডি কৰে । পাঠদান আৰু গৱেষণাৰ ৩০ বছৰৰো অধিক অভিজ্ঞতা আৰু‌‌ জিঅ’টেকনিকেল ইঞ্জিনিয়াৰিঙৰ ৩৫ খন এম টেক গবেষণামূলক পত্ৰ আৰু আৰু ৯ খন পি এইচ ডি থেছিছৰ তত্বাৱধায়কৰ দায়িত্ব পালন কৰিছে ড° বৈদ্যই ৷

আই আই টি খড়গপুৰ জোনৰ ভাইচ চেয়াৰমেন, চেয়াৰমেন জে ই ই, প্ৰ’ ইনচাৰ্জ পৰীক্ষা আদি দায়িত্বশীল পদকে ধৰি আই আই টি খড়গপুৰত বিভিন্ন প্ৰশাসনিক পদত কাম কৰিছে তেওঁ ।

ৰাষ্ট্ৰীয় আৰু আন্তঃৰাষ্ট্ৰীয় আলোচনী আৰু সন্মিলনত তেওঁৰ ১২৫ খনতকৈও অধিক গৱেষণা পত্ৰ প্ৰকাশ পাইছে ৷ ইয়াৰে ৪ খন গৱেষণা পত্ৰই শ্ৰেষ্ঠ গৱেষণা পত্ৰৰ বঁটা লাভ কৰিছে । তেওঁ দুবছৰৰ বাবে ইউনিভাৰ্চিটি অৱ ৱেষ্ট ইণ্ডিজ, ট্ৰিনিদাদ এণ্ড ট’বাগোত অধ্যাপক হিচাপে কাৰ্যনিৰ্বাহ কৰিছিল ।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।