Silchar News: শিলচৰৰ বিভিন্ন অঞ্চলত আৰম্ভ উচ্ছেদ অভিযান 

শিলচৰ, ২৪ মাৰ্চ: শিলচৰ চহৰৰ বিভিন্ন এলেকাত আৰম্ভ হৈছে উচ্ছেদ অভিযান । শিলচৰ পৌৰসভা আৰু জলসম্পদ বিভাগে‌ স্থবিৰ পানীৰ সমস্যা সমাধানৰ সমান্তৰালকৈ মথাউৰিৰ মেৰামতি আৰু নতুন মথাউৰি নিৰ্মাণৰ লগতে মথাউৰিৰ খহনীয়া ৰোধৰ কাম আৰম্ভ কৰিবলৈ বিভিন্ন অঞ্চলত উচ্ছেদ অভিযান চলাই আছে ।

এই অভিযানত বুলডজাৰেৰে ভাঙি পেলোৱা হৈছে ডাঙৰ ডাঙৰ অট্টালিকাসমূহ । নদীৰ পাৰৰ অঞ্চলত অবৈধ গৃহ ভাঙি পেলোৱাৰ ফলত শ শ লোক গৃহহীন হৈ পৰিছে । অৱশ্যে কোনেও বিৰোধ কৰা নাই এই উচ্ছেদ অভিযানৰ ৷ এতিয়ালৈকে শান্তিপূৰ্ণভাৱে চলি আছে উচ্ছেদ অভিযান ।

এই কাম পূৰ্ণগতিত চলি আছে বুলি ক’ব‌ পাৰি । বাৰিষা আহিলে শিলচৰৰ অম্বিকাপট্টিত প্ৰতিবাৰেই কৃত্ৰিম বানৰ সৃষ্টি হয় । আৱদ্ধ হৈ থকা পানীৰ সমস্যা সমাধানৰ বাবে অম্বিকাপট্টি অঞ্চলত নলা আৰু ফুটপাথ নিৰ্মাণৰ কাম আৰম্ভ হ’ব । এই কাম সুভাষ নগৰ খাললৈকে হ’ব । ইয়াৰ বাবে উচ্ছেদ অভিযান আৰম্ভ হৈছে ৷

অম্বিকাপট্টিৰ উচ্ছেদ অভিযানৰ সময়ত নিৰাপত্তাৰক্ষী, কাছাৰ জিলা প্ৰশাসন আৰু পৌৰসভাৰ কৰ্মী উপস্থিত থাকে । অম্বিকাপট্টি অঞ্চলৰ ঘৰৰ সীমা দেৱাল, গেট, চিৰি আৰু অন্যান্য আন্তঃগাঁথনি এফালৰ পৰা ভাঙি পেলোৱা হয় । আনহাতে, অন্নপূৰ্ণাঘাটত নদীৰ মথাউৰি মেৰামতি, মথাউৰিটোৰ কিছু নতুন নিৰ্মাণ আৰু খহনীয়া ৰোধৰ কাম আৰম্ভ কৰিবলৈ নিউ কলনীত উচ্ছেদ অভিযান আৰম্ভ কৰা হৈছে ।

কাছাৰৰ জলসম্পদ বিভাগৰ উদ্যোগত নিউ কলনীৰ নদীৰ পাৰৰ ঘৰ ভাঙি পেলোৱাৰ কাম দ্ৰুতগতিত আৰম্ভ হৈছে ৷ অন্নপূৰ্ণাঘাটৰ অন্নপূৰ্ণা মন্দিৰ পইণ্টৰ পৰা আৰম্ভ কৰি শৰবপট্টালৈকে উচ্ছেদ অভিযান চলোৱা হয় । মুঠতে ১০০ টা ঘৰ আৰু এটা মন্দিৰ ধ্বংস কৰা হৈছে । আনহাতে, সোণাইমুখৰ পৰা তাৰাপুৰ নদীৰ মথাউৰি নিৰ্মাণ আৰু মেৰামতিৰ বাবে ভাগাডহৰ, বাদ্ৰীঘাট, আৰু বেৰেংগা অঞ্চলত উচ্ছেদ অভিযানৰ কাম আৰম্ভ কৰা হৈছে ৷ এই অঞ্চলৰ উচ্ছেদত দোকানৰ লগতে মুঠ ২২টা ঘৰ ধ্বংস হয় ।

অৱশ্যে উচ্ছেদক ​​লৈ কোনো ধৰণৰ অপ্ৰীতিকৰ ঘটনা সংঘটিত হোৱা নাই । জানিব পৰা মতে, উচ্ছেদ কৰা সকলো অঞ্চলতে মথাউৰিৰ উচ্চতা বৃদ্ধি কৰাৰ লগতে খহনীয়া ৰোধৰ কাম কৰা হ’ব । দলং নিৰ্মাণৰ বাবে বৰাক নদীৰ সিপাৰে জিঅ’ বেগ ব্যৱহাৰ কৰা হ’ব ।
আনহাতে, নদীখনৰ পানীৰ সোঁতক অন্য দিশলৈ নিবলৈ তলত পাৰকুপাইন চেটিঙৰ কাম কৰা হ’ব । ইয়াৰ উপৰিও ইয়াত মাটি পেলাই বৰ্তমানৰ পুৰণি মথাউৰিটোৰ উচ্চতা একেলগে বৃদ্ধি কৰা হ’ব । লগতে ভাগাডহৰ, বাদ্ৰীঘাট,, চৌধুৰীঘাট, বেৰেংগাকে ধৰি পুৰণি মথাউৰিৰ উচ্চতা বৃদ্ধি কৰা হ’ব ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।