Assam University Silchar: শিক্ষাৰ্থীৰ আন্দোলনত পৰীক্ষা স্থগিত ৰাখিলে অসম বিশ্ববিদ্যালয়ে

শিলচৰ, ২১ মাৰ্চ: শিক্ষাৰ্থীৰ দাবীত ইতিমধ্যে অসম বিশ্ববিদ্যালয়ে পিছুৱাই দিছে কেইবাটাও বিষয়ৰ পৰীক্ষা । পিজি, ইউজি আৰু আইজি পৰীক্ষা পিছুৱাই দিয়া হৈছে যদিও নতুন তাৰিখ ঘোষণা কৰা হোৱা নাই ।

অসম বিশ্ববিদ্যালয়ৰ স্নাতকোত্তৰ মহলাৰ প্ৰথম আৰু তৃতীয় ষান্মাসিকৰ পৰীক্ষাৰ ৰুটিন‌ ঘোষণা কৰিছিল কৰ্তৃপক্ষই । লগে লগে বিশ্ববিদ্যালয়খনৰ ছাত্ৰ-ছাত্ৰীসকলে বিভিন্ন দাবীৰে প্ৰতিবাদত বহিছিল ।

২৮ মাৰ্চৰ পৰীক্ষা স্থগিত ৰখাৰ লগতে বিভিন্ন দাবী সন্দৰ্ভত দীৰ্ঘদিন ধৰি ছাত্ৰ-ছাত্ৰী আৰু অসম বিশ্ববিদ্যালয় কৰ্তৃপক্ষৰ মাজত বিবাদৰ সৃষ্টি হৈছিল । সোমবাৰে অসম বিশ্ববিদ্যালয়ৰ গেটৰ সন্মুখত সমবেত হৈ বিভিন্ন দাবীৰে প্ৰতিবাদ সাব্যস্ত কৰে শিক্ষাৰ্থীসকলে । যাৰ পৰিপ্ৰেক্ষিতত বিশ্ববিদ্যালয়খনৰ কাম-কাজ স্তব্ধ হৈ পৰে ।

বিশ্ববিদ্যালয়ৰ ভিতৰলৈ কাকো প্ৰবেশ কৰিবলৈ নিদিলে প্ৰতিবাদকাৰীসকলে । পুৱা ৯ বজাৰ পৰা আৰম্ভ হোৱা এই আন্দোলন বিয়লি ৩ বজালৈকে চলি থাকে । আন্দোলনৰ সময়ত ছাত্ৰ-ছাত্ৰীৰ হৈ অসম বিশ্ববিদ্যালয়ৰ ছাত্ৰ পল্লব দে, ছাত্ৰ নেতা অৰ্ণব গোস্বামী, কবীৰ মানা চৌধুৰী, ৰাজশ্ৰী মহন্তকে ধৰি একাংশ ছাত্ৰ-ছাত্ৰীয়ে নিজৰ দাবীৰে অসম বিশ্ববিদ্যালয় কৰ্তৃপক্ষৰ সৈতে হোৱা বৈঠকত অংশগ্ৰহণ কৰে ।

বিভিন্ন বিষয়ত কৰ্তৃপক্ষৰ সৈতে আলোচনা কৰা হয় । আন্দোলনকাৰী ছাত্ৰ-ছাত্ৰীসকলে কয় যে কৰ্তৃপক্ষই সকলো দাবী মানি লয় । ছাত্ৰ-ছাত্ৰীৰ প্ৰথম দাবী আছিল অসম বিশ্ববিদ্যালয়ত পিজি-ইউজি আদি পৰীক্ষা ২৮ মাৰ্চৰ পৰা পিছুৱাই দিয়া ৷ কিয়নো এই পৰীক্ষাসমূহ আগতে প্ৰতি বছৰে ২৫ এপ্ৰিলৰ পিচত আৰম্ভ হৈছিল । কিন্তু এইবাৰ অসম বিশ্ববিদ্যালয় কৰ্তৃপক্ষই জাননী জাৰি কৰিছে যে ২৮ মাৰ্চৰ পৰা পৰীক্ষা আৰম্ভ হ’ব ।

অধিসূচনা পোহৰলৈ অহাৰ পিচৰে পৰা ছাত্ৰ-ছাত্ৰীসকলে পৰীক্ষা পিছুৱাই দিবলৈ দাবী জনাইছিল যদিও ২৮ মাৰ্চৰ পৰা পৰীক্ষা অনুষ্ঠিত কৰাৰ ক্ষেত্ৰত কৰ্তৃপক্ষ অটল আছিল । দ্বিতীয়টো দাবী আছিল অসম বিশ্ববিদ্যালয়ত পানীৰ নাটনি অতি শীঘ্ৰে দুৰ কৰা । তৃতীয়টো দাবী আছিল অসম বিশ্ববিদ্যালয়ত বাছৰ সংখ্যা পৰ্যাপ্ত নহয়, ছাত্ৰ-ছাত্ৰীয়ে অতি কষ্টেৰে অহা যোৱা কৰিব লগা হৈছে ।

গতিকে বাছৰ সংখ্যা বৃদ্ধি কৰা ৷ বহু আলোচনাৰ অন্তত অসম বিশ্ববিদ্যালয় কৰ্তৃপক্ষই পৰীক্ষাৰ দিন পিছুৱাই দিবলৈ সন্মত হয় । বাছৰ সংখ্যা বৃদ্ধিৰ বাবেও কৰ্তৃপক্ষই সন্মতি প্ৰকাশ কৰিছে ৷ কৰ্তৃপক্ষই এই সন্দৰ্ভত ৰাজ্য চৰকাৰৰ সৈতে কথা পাতিব বুলি জনাইছে ৷ আন্দোলনকাৰী ছাত্ৰ-ছাত্ৰীসকলে কয় যে কৰ্তৃপক্ষই এসপ্তাহৰ ভিতৰত পানীৰ সমস্যা সমাধান কৰাৰো প্ৰতিশ্ৰুতি দিছে ।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।