Gulab Chand Kataria: তিনি দিনীয়া ভ্ৰমণসূচী লৈ বৰাক উপত্যকাত উপস্থিত ৰাজ্যপাল

শিলচৰ, ২২ মে: যোৱা এটা দশকমানৰ ভিতৰত অসমত পথ আৰু ৰে’লৱেৰ আন্তঃগাঁথনিৰ যথেষ্ট বৃদ্ধি, উন্নয়ন আৰু আইন-শৃংখলাৰ যথেষ্ট উন্নতি সাক্ষী হৈছে ৷ এই মন্তব্য ৰাজ্যপাল গুলাৱ চান্দ কাটাৰিয়াৰ । সোমবাৰে বৰাক উপত্যকালৈ তিনি দিনীয়া ভ্ৰমণসূচীৰে শিলচৰত উপস্থিত হোৱা ৰাজ্যপাল কাটাৰিয়াই বিভিন্ন চৰকাৰী প্ৰকল্পৰ কামৰ অগ্ৰগতি পৰ্যালোচনাৰ বাবে এখন বৈঠকত অংশগ্ৰহণ কৰি কাছাৰ জিলা উপায়ুক্তৰ কাৰ্যালয়ত সাংবাদিকৰ সৈতে বাৰ্তালাপ কৰি তেওঁ এই কথা কয় ।

তেওঁ কয় যে যোৱা ১০ৰ পৰা ১২ বছৰত অসমত বহু পৰিৱৰ্তন হৈছে । পথ আৰু ৰে’ল সংযোগৰ ক্ষেত্ৰত আন্তঃগাঁথনিৰ ক্ষেত্ৰত প্ৰশংসনীয় উন্নতি হৈছে । আইন-শৃংখলা ব্যৱস্থাৰ উন্নতি হৈছে আৰু এয়া এক ইতিবাচক লক্ষণ । ৰাজ্যত যদি শান্তি হয় তেন্তে প্ৰগতি আৰু উন্নয়ন নিশ্চয় আহিব বুলি কটাৰিয়াই কয় ।

ৰাজ্যপালগৰাকীয়ে বিভিন্ন বিভাগৰ সৈতে বৈঠকত মিলিত হৈ কাছাৰ জিলাৰ প্ৰধানমন্ত্ৰী আৱাস যোজনা, প্ৰধানমন্ত্ৰী কিষাণ সন্মান নিধি আদিকে ধৰি কেন্দ্ৰৰ বিভিন্ন আঁচনিৰ কামৰ অগ্ৰগতিৰ পৰ্যালোচনা কৰে । তেওঁ কয় যে অহা ছমাহৰ ভিতৰত অসমৰ প্ৰতিখন জিলা ভ্ৰমণ কৰি কেন্দ্ৰৰ বিভিন্ন কল্যাণমূলক আঁচনিৰ অগ্ৰগতি পৰীক্ষা কৰাৰ চেষ্টা কৰিব যাতে সাধাৰণ ৰাইজে আঁচনিৰ সুবিধা লাভ কৰে ।

ৰাজ্যপাল গুলাব চান্দ কাটাৰিয়াই জনস্বাস্থ্য অভিযান্ত্ৰিক, জলসম্পদ, পঞ্চায়ত আৰু গ্ৰামোন্নয়ন, কৰ্ম আৰু জলসিঞ্চন বিভাগকে ধৰি বিভিন্ন বিভাগৰ সৈতে বৈঠকত অংশগ্ৰহণ কৰি বিভিন্ন চৰকাৰী প্ৰকল্পৰ কামৰ অগ্ৰগতিৰ বিষয়ে জানিবলৈ দিয়ে ।

ৰাজ্যপালগৰাকীয়ে নিৰাপত্তা বাহিনীৰ সৈতেও বৈঠকত মিলিত হৈ জিলাখনৰ আইন-শৃংখলা পৰিস্থিতিৰ পৰ্যালোচনা কৰে । ৰাজ্যপাল কাটাৰিয়াই বিভিন্ন আঁচনি ৰূপায়ণৰ ক্ষেত্ৰত কাছাৰ জিলা প্ৰশাসনৰ কৰ্মক্ষমতা আৰু সমগ্ৰ জিলাতে শান্তিপূৰ্ণ পৰিৱেশ বজাই ৰখাৰ বাবে আইন আৰু বলবৎকাৰী কৰ্তৃপক্ষৰ দৃঢ় দৃষ্টিভংগীক লৈ সন্তুষ্টি প্ৰকাশ কৰে ।

পিছত ৰাজ্যপাল এন আই টি শিলচৰত অনুষ্ঠিত ছাত্ৰ-ছাত্ৰী আৰু শিক্ষক-শিক্ষয়িত্ৰীৰ সৈতে এক মত-বিনিময় কাৰ্যসূচীত অংশগ্ৰহণ কৰি ভাষণ দিয়ে । শিলচৰ এন আই টিত বৃক্ষৰোপণৰ কাৰ্যসূচী সম্পূৰ্ণ কৰাৰ পিছত ৰাজ্যপালগৰাকীয়ে অসম বিশ্ববিদ্যালয়লৈ গৈ এটা প্ৰেক্ষাগৃহৰ আধাৰশিলা স্থাপন কৰে আৰু একেধৰণৰ মত-বিনিময় কাৰ্যসূচীত অংশগ্ৰহণ কৰি বিপিনচন্দ্ৰ পাল প্ৰেক্ষাগৃহত অনুষ্ঠিত এখন সভাত ভাষণ দিয়ে ।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।