Silchar News: আঠ মাহ উকলিল, আৰম্ভ নহ'ল মধুৰা নদীৰ চিগা মথাউৰি‌ মেৰামতিৰ কাম

আখি দাস, শিলচৰ:‌‌ যদিও কাছাৰ জিলাৰ বিভিন্ন অঞ্চলত আংশিক নদীৰ মথাউৰি মেৰামতিৰ কাম আৰম্ভ হৈছে, তথাপিও আঠ মাহৰ ভয়াৱহ বানপানীৰ পাছতো উধাৰবন্দৰ মধুৰা নদীৰ ভঙা মথাউৰিটোৰ মেৰামতিৰ কাম আৰম্ভ হোৱা নাই ।

যোৱা বছৰ উধাৰবন্দ অঞ্চলো ভয়াৱহ বানপানীৰ ফলত ক্ষতিগ্ৰস্ত হৈছিল । দুটাকৈ বানৰ ফলত চিগি গৈছিল মধুৰা নদীৰ মথাউৰি । শিলচৰ কুম্ভীৰগ্ৰামৰ ভিআইপি পথত বানপানী‌ হৈ পথটোৰে নাও চলাচল কৰিছিল । বিমান যাত্ৰীসকলে বিভিন্ন সমস্যাৰ সন্মুখীন হ’বলগীয়া হৈছিল ।

মধুৰা নদীৰ আগ্ৰাসী পানীৰ প্ৰবাহৰ বাবে উধাৰগাও অঞ্চলৰ কেইবাটাও স্থানত মথাউৰি চিগি দহখনতকৈও অধিক গাঁও প্লাৱিত হৈছিল । হাজাৰৰো অধিক লোক গৃহহীন হৈ পৰে সেই বানত । যোৱা বানপানীৰ পাছত জলসম্পদ বিভাগে মথাউৰিটো পৰিদৰ্শন কৰি বাৰিষাৰ পূৰ্বে মেৰামতিৰ কাম কৰা হ’ব বুলি জানিবলৈ দিয়ে ।

কিন্তু পৰিতাপৰ বিষয় যে আঠ মাহ পাৰ হৈ গ’ল, খৰালিও গ’ল আৰু বাৰিষা আহিল, জলসম্পদ বিভাগে কিন্তু মথাউৰি মেৰামতিৰ কাম আৰম্ভ নকৰিলে ৷ ইফালে নদীৰ খহনীয়াই ক্ৰমান্বয়ে মথাউৰিৰ পথটো খহাই পেলাইছে । বাঁহ-মাটি আদিৰে গাঁওবাসীয়ে খহনীয়া ৰোধ কৰাৰ চেষ্টা কৰে যদিও স্থানীয় বিধায়ক মিহিৰাকান্তি সোমৰ লগতে জলসম্পদ বিভাগৰ গা লৰা নাই ।

জলসম্পদ বিভাগে এদিন বা দুদিন নদীৰ মথাউৰি এলেকা পৰিদৰ্শন কৰাৰ বাহিৰে একো নকৰিলে । খৰালিৰ পিছত বাৰিষাৰ সময় আহিল । দুৰ্গনগৰ চতুৰ্থ ব্লকৰ উধাৰগাও অঞ্চলৰ গাঁৱৰ ৰাইজৰ মাজত ক্ষোভৰ সৃষ্টি হৈছে । তেওঁলোকে কয় যে বানপানীৰ পিছত ৰাইজে সেই গাঁতবোৰ পাৰ হ’ব পৰাকৈ মাটি পেলাই দি পুৰাবলৈ চেষ্টা চলাইছিল ।

কিন্তু জলসম্পদ বিভাগে মথাউৰি পৰিদৰ্শনৰ বাহিৰে একো নকৰিলে । ৰাজ্যৰ মুখ্যমন্ত্ৰী আৰু জলসম্পদ মন্ত্ৰীৰ দৃষ্টি আকৰ্ষণ কৰি গাঁওবাসীয়ে কয় যে নদীৰ মথাউৰি মেৰামতি কৰিবলৈ এতিয়াও সময় আছে । যদি জলসম্পদ বিভাগে বাৰিষাৰ পূৰ্বে নদীৰ মথাউৰি মেৰামতি নকৰে, তেন্তে এইবাৰো সকলো গাঁও মধুৰা নদীৰ বুকুত বুৰ গৈ শিলচৰ কুম্ভীৰগ্ৰামৰ ভিআইপি পথ বন্ধ হৈ পৰিব ।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।