Silchar News: বিষ্ণুপ্ৰিয়া মণিপুৰী ভাষা শ্বহীদ সুদেষ্ণা সিংহৰ ২৮ সংখ্যক শ্বহীদ দিৱস পালন 

শিলচৰ, ১৬ মাৰ্চ: বিষ্ণুপ্ৰিয়া মণিপুৰী ভাষা শ্বহীদ সুদেষ্ণা সিংহৰ ২৮ সংখ্যক ভাষা শ্বহীদ দিৱস আজি শিলচৰত পালন কৰা হয় । শিলচৰৰ বিবেকানন্দ ৰোডত বৃহস্পতিবাৰে পুৱা শ্বহীদ সুদেষ্ণাৰ আৱক্ষ মূৰ্তিত বিভিন্ন মণিপুৰী সংগঠনৰ সদস্যসকলে শ্ৰদ্ধাঞ্জলি জ্ঞাপন কৰে । ইয়াৰ পিচত অনুষ্ঠিত হয় আলোচনা সভা । নিখিল বিষ্ণুপ্ৰিয়া মণিপুৰী মহাসভা, সাহিত্য সভা, বৰাক উপত্যকা বংগ সাহিত্য আৰু সংস্কৃতি সন্মিলন, মাতৃভাষা সুৰক্ষা সমিতি আদিৰ সদস্যসকলে সুদেষ্ণাৰ জীৱনৰ বিভিন্ন দিশৰ ওপৰত আলোচনা কৰে ।

বক্তাসকলে কয় যে বৰাক উপত্যকা পবিত্ৰ তীৰ্থস্থান আৰু মাতৃভাষাৰ তৃতীয় ভূমি । প্ৰথমে নাৰী শ্বহীদ কমলা ভট্টাচাৰ্য আৰু তাৰ পিচত ভাষা শ্বহীদ সুদেষ্ণা সিংহ । পৰৱৰ্তী প্ৰজন্মই মাতৃভাষা ৰক্ষাৰ দায়িত্ব ল’ব লাগে । মাতৃভাষা ৰক্ষাৰ স্বাৰ্থত যুৱ প্ৰজন্মক আগবাঢ়ি আহিবলৈ আহ্বান জনায় বক্তাসকলে । ইয়াৰ‌ লগতে কৰিমগঞ্জৰ পাথাৰকান্দিসহ বৰাকৰ বিভিন্ন অঞ্চলত আজি শ্বহীদ দিৱস পালন কৰা হয় ।

মন কৰিবলগীয়া যে ভাৰত বিভাজনৰ পাচত দেশৰ সংবিধানে ৰাজ্যৰ সকলো ভাষী লোককে মাতৃভাষাৰ জৰিয়তে শিক্ষা লাভ কৰাৰ মৌলিক অধিকাৰ দিছিল যদিও অসমৰ বিষ্ণুপ্ৰিয়া মণিপুৰীসকলৰ সেই অধিকাৰ নাছিল । ইয়াৰ বাবেই ১৯৫৫ চনত অসমৰ বৰাক উপত্যকাত বিষ্ণুপ্ৰিয়া মণিপুৰী ভাষা আন্দোলন আৰম্ভ হয় । সেই বছৰতে "নিখিল বিষ্ণুপ্ৰিয়া মণিপুৰী মহাসভা"ই মাতৃভাষাৰ জৰিয়তে পাঠদানৰ ৭ দফীয়া দাবীৰে আন্দোলন আৰম্ভ কৰে । পিচলৈ এই আন্দোলন সত্যাগ্ৰহৰ ৰূপত দশক দশক ধৰি চলি থাকিল যদিও বিষ্ণুপ্ৰিয়াসকলৰ ভাষাই স্বীকৃতি নাপালে ।

১৯৯২ চনত "বিষ্ণুপ্ৰিয়া মণিপুৰী গণ সংগ্ৰাম পৰিষদ" গঠন হয় । এই সংগঠনৰ নেতৃত্বত ১৯৯২ চনৰ পৰা ১৯৯৫ চনলৈকে অসম আৰু ত্ৰিপুৰাত কেইবাটাও ৰেল অৱৰোধ, পথ অৱৰোধ, গণ অনশন আৰু বিভিন্ন প্ৰতিবাদী কাৰ্যসূচী অব্যাহত থাকে ৷ ১৯৯৫ চনত ত্ৰিপুৰা চৰকাৰে প্ৰাথমিক বিদ্যালয়ত বিষ্ণুপ্ৰিয়া মণিপুৰী ভাষা প্ৰৱৰ্তন কৰে । কিন্তু এই পৰ্যন্ত অসমত তেনেধৰণৰ একো নহ'ল ৷ সেয়েহে গণসংগ্ৰাম পৰিষদে মাৰ্চ মাহত অবিৰত ৰে'ল অৱৰোধৰ আহ্বান জনায় ।

বৰ্তমান অসমৰ হাইলাকান্দি, কাছাৰ, পাথাৰকান্দি, কৰিমগঞ্জ, মেঘালয়, ত্ৰিপুৰা আৰু মণিপুৰ ৰাজ্যত বৃহৎ সংখ্যক বিষ্ণুপ্ৰিয়া মণিপুৰী জনগোষ্ঠী বসবাস কৰে । মণিপুৰীৰ উৎপত্তি মণিপুৰ আৰু ইয়াৰ বাসিন্দাসকলৰ অধিকাংশই মেইটেই বংশৰ । বিষ্ণুপ্ৰিয়া গোটৰ ভাষাসমূহ ভাৰত-ইউৰোপীয় ভাষা গোটৰ সদস্য আৰু বাংলা আৰু অসমীয়া ভাষাৰ মাজত সাদৃশ্য থকাৰ বাবেই বিষ্ণুপ্ৰিয়া গোটৰ ভাষাসমূহক মণিপুৰী বুলি স্বীকৃতি দিবলৈ অনিচ্ছুক। এই ভাষাৰ স্বীকৃতিৰ দাবীতেই এই আন্দোলন ।

১৯৯৬ চনৰ ১৬ মাৰ্চত "নিখিল বিষ্ণুপ্ৰিয়া মণিপুৰী ছাত্ৰ সন্থা"ই ৫০১ ঘন্টাৰ আটাইতকৈ দীঘলীয়া ৰেল ধৰ্মঘট ঘোষণা কৰে প্ৰতিবাদকাৰীসকলৰ ভিতৰত সুদেষ্ণা সিংহ নামৰ এগৰাকী ৩২ বছৰীয়া কিশোৰীও আছিল । অসমৰ বিষ্ণুপ্ৰিয়া মণিপুৰী প্ৰধান অঞ্চলৰ পৰা ‘ইমাৰ ঠাৰ’ (মাতৃভাষা) আন্দোলনত জড়িত হৈ পৰে সুদেষ্ণা । ১৯৯৬ চনৰ ১৬ মাৰ্চত ‘ৰেল ৰোকো’ আন্দোলনৰ সময়ত তেওঁ আৰক্ষীৰ গুলীত নিহত হয় । এই ঘটনাক লৈ আন্দোলনমুখী হৈ পৰে অসম আৰু ত্ৰিপুৰা । পিচত অসম চৰকাৰে বিষ্ণুপ্ৰিয়াসকলৰ সকলো দাবী মানি লোৱাৰ প্ৰতিশ্ৰুতি দিয়ে । তাৰ পিচত ২০০১ চনত অসমৰ বৰাক উপত্যকাৰ প্ৰায় সকলো (১৫২) প্ৰাথমিক বিদ্যালয়তে বিষ্ণুপ্ৰিয়া মণিপুৰী ভাষাত পাঠদান আৰম্ভ হয় । প্ৰায় ৬ বছৰ পিচত ২০০৬ চনত বিষ্ণুপ্ৰিয়া মণিপুৰী ভাষাক উচ্চতম ন্যায়ালয়ে স্বতন্ত্ৰ মণিপুৰী ভাষা হিচাপে স্বীকৃতি দিয়ে । প্ৰতি বছৰে বিষ্ণুপ্ৰিয়া মণিপুৰীসকলে ১৬ মাৰ্চ তাৰিখটো ‘শ্বহীদ সুদেষ্ণা দিৱস’ হিচাপে পালন কৰি আহিছে ।

অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|