স্মাৰ্ট আৰক্ষীৰ বিফলতাৰ বাবেই গ্ৰেপ্তাৰ হোৱাৰ পৰা ৰক্ষা পৰিল জুবিনক অপদস্থকাৰী

নিশা জুবিনক অশালীন আচৰণেৰে অপদস্থ কৰি আত্মগোপন কৰি থকা ৪ যুৱকৰ জামিন মঞ্জুৰ কৰিছে গুৱাহাটী CJM আদালতে৷ জুবিন গাৰ্গক অপদস্থ কৰাৰ অভিযোগত অভিযুক্ত ডাঃ অৰূপজ্যোতি তালুকদাৰ, হিৰকজ্যোতি ৰাজবংশী, দিশান ভাগৱতী আৰু গীতাৰ্থ ডেকাৰ জামিন লাভ৷ জুবিন গাৰ্গক অশালীন আচৰণ কৰি পলাই আছিল চাৰিওগৰাকী অভিযুক্ত৷ আৰক্ষীয়ে অভিযান চলায়ো সন্ধান উলিয়াব পৰা নাছিল হিৰকজ্যোতি ৰাজবংশী এণ্ড টীমৰ ৷ কিন্তু সোমবাৰে NSUIৰ নেতাকেইজনৰ জামিন মঞ্জুৰ কৰিছে গুৱাহাটী CJM আদালতে৷

দিছপুৰ থানাত ভাৰতীয় দণ্ডবিধিৰ ১৪৩/১৮৮/২৬৯/২৭০/৩৪১/২৯৪/৫০০/৫০৬ ধাৰাত জুবিন গাৰ্গৰ এজাহাৰৰ ভিত্তিত ৰুজু হৈছিল গোচৰ৷ প্ৰতিজন অভিযুক্তই ১০,০০০ টকা বণ্ডৰ বিনিময়ত লাভ কৰিছে জামিন৷ জামিন লাভ কৰিলেও অভিযুক্তকেইজনক ৫ দিনৰ ভিতৰত দিছপুৰ থানাত হাজিৰ হ’বলৈ নিৰ্দেশ দিয়ে আদালতে।

মহানগৰীৰ স্মাৰ্ট আৰক্ষীয়ে অভিযুক্তৰ কোনো সন্ধান উলিয়াব নোৱাৰিলে বাবেই গ্ৰেপ্তাৰ হোৱাৰ পৰা ৰক্ষা পৰিল জুবিন অপদস্থকাৰী ৷ আদালত বন্ধ থকাৰ বাবে আত্মগোপন কৰি থকা অভিযুক্ত কেইজনে সোমবাৰে আদালত খোলাৰ লগে লগে আবেদন কৰিছিল জামিনৰ বাবে৷ আৰু সেই আবেদনৰ ভিত্তিতেই ৪ অভিযুক্তৰ জামিন মঞ্জুৰ কৰে আদালতে৷ এতিয়া লক্ষণীয় হ'ব আদালতৰ নিৰ্দেশ পালন কৰি কেতিয়া ৪ অভিযুক্ত হাজিৰ হয় দিছপুৰ আৰক্ষী থানাত৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।