গুৱাহাটীৰ পাথৰকুৱেৰীত নৃশংস হত্যাকাণ্ড, ৰডেৰে হানি–খুচি হত্যা এজন যুৱকক

গুৱাহাটী মহানগৰীৰ পাথৰকুৱেৰীৰ মেগজিনত এজন যুৱকক ৰডেৰে হানি–খুচি নৃশংসভাৱে হত্যা কৰে দুৰ্বৃত্তই। এই ঘটনাকলৈ অঞ্চলজুৰি তীব্ৰ চাঞ্চল্যৰ সৃষ্টি কৰিছে। মৃত যুৱকজন হৈছে ছয়মাইলৰ ৰাধা নগৰৰ মুন্না আলী।

উল্লেখযোগ্য যে মুন্না আলীয়ে পাথৰকুৱেৰী অঞ্চলত ৰাজ মিস্ত্ৰী কাম কৰি চাৰিজনীয়া পৰিয়ালটোক পোহ পাল দি আছিল যুৱকজনে। সোমবাৰে সন্ধিয়া কামৰ সন্ধানত ঘৰৰ পৰা ওলাই আহে। নিশাৰ ভাগত ঘৰলৈ উভতি নোযোৱাত মুন্নাক পৰিয়ালৰ লোকে বিভিন্ন ঠাইত বিচাৰ–খোচাৰ কৰে।

মঙলবাৰে পুৱাৰ ভাগত পাথৰকুৱেৰীৰ মেগজিনৰ শিলসাঁকো বিলৰ পাৰত এটা নিৰ্মীয়মান ঘৰৰ চৌহদত তেজেৰে লুটুৰি–পুতুৰি অৱস্থাত মুন্নাৰ মৃতদেহ স্থানীয় ৰাইজে প্ৰত্যক্ষ কৰে। ইয়াৰ পিছত ৰাইজে মুন্নাৰ পৰিয়ালক খবৰ দিয়ে।

মৃতদেহৰ কাষত মোবাইল ফোন, লোৰ ৰড, জোতা আদি পৰি থকালৈ লক্ষ্য কৰি দুষ্কৃতিকাৰীয়ে মুন্না অলীক হত্যা কৰা বুলি সন্দেহ কৰা হৈছে। ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে।