ভয়ংকৰ দুৰ্ঘটনাই অকালতে প্ৰাণ কাঢ়ি নিলে এক উজ্জ্বল সম্ভাৱনাৰ, লখিমপুৰত বাছৰ খুন্দাত নিহত সংবাদকৰ্মী ডলী হাজৰিকা

ভয়ংকৰ দুৰ্ঘটনাই অকালতে প্ৰাণ কাঢ়ি নিলে এক উজ্জ্বল সম্ভাৱনাৰ। লখিমপুৰত ভয়ংকৰ দুৰ্ঘটনাত প্ৰাণ গ’ল এগৰাকী সংবাদ কৰ্মীৰ। নিহত যুৱতীগৰাকীৰ নাম ডলী হাজৰিকা। যোৱানিশা বিহপুৰীয়াৰ সন্তপুৰত সংঘটিত হয় এই ভয়ংকৰ দুৰ্ঘটনা। এখন তীব্ৰবেগী আলট্ৰা বাছে মহতিয়াই নিয়াৰ ফলত গুৰুতৰভাৱে আহত ডলীৰ হাস্পতাললৈ নিয়াৰ পথত মৃত্যু হয়।

বিবাহ যাত্ৰী কঢ়িয়াই নিয়া বাছখনে মহতিয়াই নিয়ে পিতৃ–কন্যাক। এই দুৰ্ঘটনাত গুৰুতৰভাৱে আহত হয় ডলীৰ পিতৃ দিলীপ হাজৰিকা। আহত দিলীপ হাজৰিকা বৰ্তমান চিকিৎসাধীন। দুৰ্ঘটনা সংঘটিত কৰিয়ে পলায়ন কৰে বাছখনৰ চালকজন।



উল্লেখযোগ্য যে গুৱাহাটীৰ এটা সংবাদ প্ৰতিষ্ঠানত কৰ্মৰত আছিল ডলী। ছুটী লৈ ঘৰলৈ গৈছিল যুৱতীগৰাকী। সন্ধিয়া পিতৃৰ সৈতে ঘৰৰ পৰা কোনো কামত ওলাই আহিছিল ডলী। সেই সময়তে তীব্ৰবেগী বাছখনে মহতিয়াই নিয়ে পিতৃ–কন্যাক। যাৰ ফলত ডলী হাজৰিকাৰ মৃত্যু হোৱাৰ লগতে গুৰুতৰভাৱে আহত হৈ বৰ্তমান লখিমপুৰ চিকিৎসা মহাবিদ্যালয়ত চিকিৎসাধীন হৈ আছে ডলীৰ পিতৃ।

অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|