হাইলাকান্দিত কোৰোণাৰ ভয়তে জীৱনৰ মোহ এৰিলে এগৰাকী মহিলাই!

দেওবাৰে পুৱা হাইলাকান্দি জিলাৰ নিশ্চিতপুৰ গাঁৱত সংঘটিত হয় এক মৰ্মান্তিক ঘটনা। কোৰোণাৰ দুশ্চিন্তাতে জীৱনৰ মোহ এৰিলে এগৰাকী মহিলাই। গাঁওখনৰ আবুল হুছেইনে পত্নী চাৰবিন তাজ আৰু ৭ বছৰীয়া সন্তানৰ সৈতে দীৰ্ঘদিনৰ পৰা বাংগালুৰুত বাস কৰিছিল। কিন্তু লকডাউনৰ ফলত কৰ্মসংস্থান বন্ধ হোৱাৰ বাবে  ২৮ জুনত নিজ ঘৰলৈ উভতি আহিছিল পৰিয়ালটো। হাইলাকান্দিলৈ অহাৰ পিছতে এওঁলোকক গাঁৱতে থকা এখন বিদ্যালয়ত কোৱাৰেণ্টাইন কৰা হয়।

২৮ জুনত পৰিয়ালটোৰ নমুনা সংগ্ৰহ কৰা হয়। আবুল হুছেইনৰ ৰিপ’ৰ্ট নিগেটিভ আহিছে যদিও ৭ বছৰীয়া পুত্ৰ আৰু মহিলাগৰাকীৰ ৰিপ’ৰ্চ নহা বাবে হতাশা আৰু দুশ্চিন্তাত ভুগিছিল মহিলাগৰাকী। ইপিনে, মহিলাগৰাকীৰ বাংগালুৰুৰ ৪ গৰাকী প্ৰতিৱেশীৰ কোৰোণাত মৃত্যু হোৱাৰ খবৰেও বিচলিত কৰি তুলিছিল মহিলাগৰাকীক। অৱশেষত দুশ্চিন্তাৰ পৰ‍া পৰিত্ৰাণ পাবলৈ দেওবাৰে পুৱা বিদ্যালয়ৰ শৌচাগাৰত চিপ লৈ মৃত্যুক সাবটি লয় বুলি মহিলাগৰাকীৰ স্বামীয়ে মন্তব্য কৰে। এই ঘটনাৰ পিছতে ঘটনাস্থলীত উপস্থিত হয় জিলা প্ৰশাসন আৰু আৰক্ষী। মহিলাৰ মৃতদেহ উদ্ধাৰ কৰি হাইলাকান্দিৰ এছ কে ৰায় অসামৰিক হাস্পতাললৈ মৰণোত্তৰ পৰীক্ষাৰ বাবে প্ৰেৰণ কৰা হয়।