গোসাইগাঁৱত চাৰিটা সন্তানৰ মাতৃক ডাইনী সন্দেহত হত্যা কৰি ওলমাই থলে গছত,  তিনি হত্যাকাৰীক গ্ৰেপ্তাৰ

কোকৰাঝাৰৰ গোসাইগাঁৱত পুনৰ অন্ধ বিশ্বাসৰ বলি হৈ প্ৰাণ হেৰুৱাবলগীয়া হ'ল এগৰাকী চাৰি সন্তানৰ দুৰ্ভগীয়া মাতৃয়ে। ঘটনাটো সংঘটিত হৈছে কোকৰাঝাৰ জিলাৰ গোসাইগাঁও থানাৰ অন্তৰ্গত গুমা বনাঞ্চল এলেকাৰ সত্যপুৰৰ মোহনপুৰ গাঁৱত ৷ মহিলাগৰাকী মোহনপুৰ গাঁৱৰ ভান টুডুৰ পত্নী অঞ্জলী মূৰ্মু (৪৫) বুলি জানিব পৰা গৈছে ৷

প্ৰাপ্ত তথ্য মতে, যোৱা ৭ মে’ত সন্ধীয়া গাঁওখনৰে বাসিন্দা ক্ৰমে সুনিল মাৰ্ডী(১৬), হোপনা হেমব্ৰম (১৬), ৰবিনছন কিস্কু (৩০) আৰু ছাকেল হেমব্ৰমে(৩০)-এ মহিলাগৰাকীক শুকুৰবাৰে নিশা ঘৰৰ পৰা ডাইনী সন্দেহত বলপূৰ্বক ভাবে উঠাই লৈ যায় ৷ লগে লগে মহিলাগৰাকীৰ স্বামীয়ে ঘটনা সন্দৰ্ভত স্থানীয় গাঁওবুঢ়াক অৱগত কৰে আৰু গাঁওবুঢ়াই তাৎক্ষণিক ভাবে গোসাইগাঁও আৰক্ষীক খবৰ দিয়ে ৷

খবৰ পাই আৰক্ষীয়ে মহিলা গৰাকীৰ সন্ধানত উদ্ধাৰ অভিযান চলাই থকাৰ সময়তে গাঁওবাসীয়ে তিনি যুৱকক আটক কৰি আৰক্ষীক গতাই দিয়ে ৷ আৰক্ষীৰ জেৰাত ধৃত যুবক তিনিটাই স্বীকাৰ কৰে যে, মহিলাগৰাকীক ডাইনী সন্দেহত হত্যা কৰি গাঁওখনৰ পৰা প্ৰায় এক কিলোমিটাৰ নিলগত হাবিৰ মাজত গছত ওলমাই থৈছে ৷

সেই মতে, সোমবাৰে পুৱা আৰক্ষীয়ে ঘটনাস্থলীত উপস্থিত হৈ মহিলাগৰাকীৰ মৃতদেহ উদ্ধাৰ কৰি গোসাইগাঁও থানালৈ লৈ আনে ৷ হত্যাকাণ্ডৰ মূল নায়ক ছাকেল হেমব্ৰম বৰ্তমান পলাতক অৱস্থাত আছে ৷