ডাইনীৰ সন্দেহত বৃদ্ধক দলবদ্ধ আক্ৰমণ, মৰিয়াই মৰিয়াই ভাঙিলে হাত

বিশ্বনাথ জিলাৰ বৰজাৰনিত ডাইনীৰ সন্দেহত এজন বৃদ্ধক দলবদ্ধভাৱে আক্ৰমণ কৰাৰ ঘটনা পোহৰলৈ আহিছে ৷  ২ নং বৰজাৰনীৰ কাচবিল  প্ৰাথমিক বিদ্যালয়ৰ চৌহদত লংকী বে' নামৰ ৬২ বছৰীয়া এজন বৃদ্ধক মাৰপিট কৰি হত্যা কৰাৰ চেষ্টা চলোৱাৰ গুৰুতৰ অভিযোগ উত্থাপিত হৈছে।

বৰজাৰণিৰ ১ নং বগীজুলিস্থিত নিজ পাম ঘৰৰ পৰা ডাইনীৰ সন্দেহত এখন চাৰিচকীয়া বাহনত চাৰিজনকৈ লোকে উঠাই আনিছিল বৃদ্ধজনক ৷ ঘটনাৰ খবৰ লাভ কৰি পৰিয়ালৰলোক ঘটনাস্থলীত উপস্থিত হোৱাৰ লগে লগেই সেই স্থান ত্যাগ কৰে নৰপিশাঁচৰ দলটোৱে ৷ ডাইনীৰ সন্দেহত দলৱদ্ধ আক্ৰমণৰ বলি হোৱা লংকী বে'ক আৰক্ষীৰ দলে পিছত ততালিকে চিকিৎসালয়লৈ লৈ যায়।

আনহাতে ঘটনাৰ পিছতে জিনজিয়া আৰক্ষী থানাৰ অন্তৰ্গত তিনিসুতি আৰক্ষী চকীত এজাহাৰ দাখিল কৰিবলৈ উপস্থিত হোৱা লংকী বে'ৰ পৰিয়ালৰ সদস্যক স্থানীয় গাওঁবুঢ়া ৰামনাথ টেৰণে এজাহাৰত ডাইনীৰ সন্দেহত দলৱদ্ধ আক্ৰমণ চলোৱাৰ প্ৰসংগ উল্লেখ নকৰিবলৈ হেঁচা প্ৰদান কৰি কেৱল মাৰপিটৰ হোৱা বুলি সাধাৰণ এখন এজাহাৰ লিখি চহী কৰাই আৰক্ষী চকীত দিয়াৰ অভিযোগ কৰিছে এজাহাৰ দাখিলকাৰী লোকজনৰ পুত্ৰই ৷

ইয়াৰ পিছতে পুনৰ ডাইনী সন্দেহত আক্ৰমণৰ বলি হোৱা বৃদ্ধজনৰ পৰিয়ালৰ লোকে বিশ্বনাথৰ আৰক্ষী অধীক্ষকক সমগ্ৰ ঘটনা বিৱৰি আন এক  অভিযোগ দাখিল কৰে ৷ কিন্তু আৰক্ষীয়ে বিষয়টো গুৰুত্ব সহকাৰে নোলোৱাৰ অভিযোগ কৰিছে ভুক্তভোগী পৰিয়ালটোৱে।  আৰক্ষী অধীক্ষকক প্ৰদান কৰা লিখিত অভিযোগত উল্লেখ থকা অনুসৰি ধনসিং ৰংপী, ৰঞ্জিত তেৰাং, বাবু বে, বিক্ৰম বে, চাৰ বে, বাবু ৰংপী, সিং তেৰাং, বিকাশ বে আৰু ধনিৰাম বে নামৰ দহগৰাকী ব্যক্তি এই ঘটনাৰ লগত জড়িত ৷

উল্লেখ্য যে, দুবছৰ পূৰ্বেও গাঁৱৰে এগৰাকী মহিলাৰ মৃত্যুৰ বাবে লংকী বে'ক জগৰীয়া কৰি এই সকললোকে নিৰ্যাতন চলোৱাৰ অভিযোগ তুলিছে পৰিয়ালৰ লোকে ৷ ইফালে কি ৰহস্যজনক কাৰণত গাওবুঢ়া ৰামনাথ টেৰনে ডাইনীৰ ঘটনা লুকুৱাবলৈ চেষ্টা কৰিছিল তাক লৈ প্ৰশ্ন উঠিছে৷