বৰপেটা লোকসভাৰ আসন বিজেপিয়ে এৰি দিব নেকি অগপক, সোণোৱালে কি ইংগিত দিলে?

লোকসভা নিৰ্বাচনৰ দিন কাষ চাপি অহাৰ সময়তে বৰপেটাৰ আসনখনক লৈ মিত্ৰজোঁটৰ মাজত ব্যাপক চৰ্চা আৰম্ভ হৈছে ৷ সংখ্যালঘু ভোটাৰে নিৰ্ণায়ক ভূমিকা গ্ৰহণ কৰি অহা সমষ্টিটোক লৈ এইবাৰ বিগ ব্ৰাদাৰ্ছ বিজেপিয়ে বিশেষ চিন্তা কৰিছে।

উল্লেখ্য যে যোৱা লোকসভা নিৰ্বাচনত মিত্ৰদল অগপক বৰপেটাৰ লগতে ধুবুৰী আৰু কলিয়াবৰ সমষ্টি এৰি দিছিল ৷ কিন্তু উক্ত তিনিওটা সমষ্টিতে অগপই পৰাজিত হ’বলগীয়া হৈছিল ৷ নিৰ্বাচনী ফলাফলত এআইউডিএফে ধুবুৰী আৰু কংগ্ৰেছে বৰপেটা আৰু কলিয়াবৰত দল জয়ী কৰিবলৈ সক্ষম হয় ৷

বিগত লোকসভা নিৰ্বাচনৰ এই ফলাফল পৰ্যালোচনা কৰি আগন্তুক দিনত অগপক বৰপেটা সমষ্টিটো এৰি দিয়া হ’ব নে নাই তাক লৈ মিত্ৰজোঁটৰ ভিতৰচ'ৰাত ব্যাপক চৰ্চা আৰম্ভ হৈছে ৷ কংগ্ৰেছ আৰু এআইইউডিএফ দলে পৃথকে নিৰ্বাচনত অৱতীৰ্ণ হোৱাৰ বাবে প্ৰস্তুতি চলাই থকাৰ পৰিপ্ৰেক্ষিতত বিজেপিয়ে এইবাৰ সমষ্টিটো মিত্ৰদল অগপক পুনৰ  এৰি নিদি নিজে প্ৰতিদ্বন্দ্বিতা  কৰাৰ সম্ভাৱনা প্ৰকট হৈ পৰিছে ৷

দেওবাৰে কেন্দ্ৰীয় মন্ত্ৰী সৰ্বানন্দ সোণোৱালে বঙাইগাঁৱত উপস্থিত হৈ বৰপেটা লোকসভা সমষ্টিত বিজেপিয়ে নিজা প্ৰাৰ্থিত্ব প্ৰদানৰ ইংগিত দিয়ে ৷ দলীয় কাৰ্যকৰ্তাৰে মত বিনিময়ৰ অন্তত বিজেপিয়ে সমষ্টিটোত জয়লাভ নিশ্চিত বুলি মন্তব্য কৰে ৷