‘কাজিৰঙাৰ ৰজা’ৰ ঘৰত প্ৰাক্তন মুখ্যমন্ত্ৰী, মন্ত্ৰী অতুল বৰাৰ সমষ্টিত কি কৰিছে প্ৰফুল্ল কুমাৰ মহন্তই?

২০২১চনৰ বিধান সভা নিৰ্বাচন সমাগত।নিৰ্বাচনৰ প্ৰাকমুহূৰ্তত অগপ সভাপতি মন্ত্ৰী অতুল বৰাৰ সমষ্টি বোকাখাতত অকস্মাৎ উপস্থিত হয় প্ৰাক্তন মুখ্যমন্ত্ৰী বিধায়ক প্ৰফুল্ল কুমাৰ মহন্ত। উপস্থিত হোৱাই নহয় এসময়ৰ কাজিৰঙাৰ ৰজা হিচাপে পৰিচিত তথা বোকাখাট সমষ্টিৰ ২০০১ আৰু ২০০৬ চনৰ নিৰ্দলীয় বিধায়ক জিতেন গগৈ আৰু আসম বিধান সভাৰ প্ৰাক্তন উপাধাক্ষ বলভদ্ৰ তামুলীৰ সৈতে প্ৰায় এঘন্টা সময় ৰুদ্ধধাৰ বৈঠকত মিলিত হয় প্ৰফুল্ল কুমাৰ মহন্ত।

প্ৰাক্তন মুখ্যমন্ত্ৰী মহন্তৰ সৈতে বৈঠক সৌজন্যমূলক সাক্ষাৎ আছিল বুলি কয় যদিও জিতেন গগৈয়ে ২০২১ ৰ নিৰ্বাচনত প্ৰতিদ্বন্দিতা কৰাৰ কথা ঘোষণা কৰে। ২০০১ আৰু ২০০৬ চনৰ নিৰ্দলীয় বিধায়ক আছিল জিতেন গগৈ। একালৰ প্ৰতাপী বিধায়ক জনে আগন্তুক নিৰ্বাচনতো জয় হব বুলি দৃঢ় মত পোষন কৰে।



অগপৰ প্ৰতিষ্ঠাপক নেতা প্ৰফুল্ল কুমাৰ মহন্তই বোকাখাটত ভ্ৰমনৰ সময়ত কিছু দিন পূৰ্বে মৃত্যু হোৱা সেই অঞ্চলৰ দুগৰাকী জনপ্ৰিয় ব্যক্তিৰ পৰিয়ালকো সাক্ষাৎ কৰে। নিৰ্বাচনৰ প্ৰাকমুহূৰ্তত বোকাখাটত উপস্থিত হৈ আঞ্চলিকতাবাদী ভাবাপন্ন দুগৰাকী প্ৰাক্তন বিধায়কৰ সৈতে প্ৰফুল্ল কুমাৰ মহন্ত ই বৈঠক কৰা খৱৰে বিশেষ তাৎপৰ্য বহন কৰিছে সমষ্টিটোৰ চুকে কোণে।

যিহেতু কেবক লৈ বৰ্তমান অগপ দুটা ভাগত বিভক্ত বুলি সকলোৱে জানে ৷ প্ৰফুল্ল কুমাৰ মহন্ত সততে সৰৱ হৈ থাকে অগপৰ তিনি মন্ত্ৰীৰ বিৰুদ্ধে ৷ বোকাখাতৰ বিধায়ক, কেবিনেট মন্ত্ৰী আৰু অগপৰ সভাপতি অতুল বৰাৰ গৃহ সমষ্টি বোকাখাতত প্ৰাক্তন বিধায়ক জীতেন গগৈৰ এতিয়াও সমষ্টিটোত এটা ভিত্তি আছে ৷ সমান্তৰাল ভাৱে এইবাৰ নিৰ্বাচনত গগৈয়ে প্ৰতিদ্বন্দিতা কৰাতো নিশ্চিত ৷ গতিকে অতি সংগোপনে কাজিৰঙাৰ ৰজাৰ ঘৰত আহি গোপন আলোচনাত মিলিত হোৱা কাৰ্যই আগন্তুক নিৰ্বাচনত অতুল বৰাৰ নিৰ্বাচনী ঘোঁৰা স্তব্ধ কৰাৰ বাবেই নেকি? নিৰ্দলীয়ভাৱে প্ৰতিদ্বন্দিতা কৰাৰ সিদ্ধান্তও ৰাজহুৱা কৰে জীতেন গগৈয়ে ৷