বিধায়ক শিলাদিত্য দেৱৰ ক্ষোভৰ আঁৰত এইবোৰ কাৰণ!

দলীয় নেতৃত্বৰ বিৰুদ্ধে ক্ষোভ উজাৰি দলৰ পৰা অৱসৰৰ হুংকাৰ দি পুনৰ এসপ্তাহৰ সময় ল’লে হোজাইৰ বিজেপি বিধায়ক শিলাদিত্য দেৱে৷ কোনবোৰ কথাক লৈ দলীয় নেতৃত্বৰ বিৰুদ্ধে দীৰ্ঘদিন ধৰি ক্ষোভ পুহি ৰাখিছে শিলাদিত্য দেৱে? এটা দুটা নহয়, বহুকেইটা কাৰক৷ এদিন দুদিনৰ নহয়, দীৰ্ঘদিনীয়া ক্ষোভ বিধায়ক শিলাদিত্য দেৱৰ৷

২০১৬ চনত বিজেপি মিত্ৰজোঁটে দিছপুৰৰ মচনদ দখল কৰাৰ পৰাই ক্ষোভ পুহি ৰাখিছে হোজাইৰ বিধায়ক শিলাদিত্য দেৱে৷ প্ৰথমতেই আহিছিল হোজাই জিলা বিজেপিৰ সভাপতি কোন হ'ব তাক লৈ প্ৰশ্ন৷ নগাঁৱৰ প্ৰাক্তন সাংসদ ৰাজেন গোঁহাই, লামডিঙৰ বিধায়ক শিবু মিশ্ৰ আৰু হোজাইৰ বিধায়ক শিলাদিত্য দেৱে সভাপতি হিচাপে বিচাৰিছিল উত্তম দাসক৷ পিছে ৰাজ্যিক নেতৃত্বই ২০১৪ৰ লোকসভা নিৰ্বাচন আৰু ২০১৬ৰ বিধানসভা নিৰ্বাচনত বিজেপিৰ বিৰোধিতা কৰা অৰ্জুন মজুমদাৰকহে দিলে হোজাই জিলা বিজেপিৰ সভাপতিৰ দায়িত্ব৷

ৰাজ্যিক বিজেপিৰ সভাপতি ৰণজিৎ কুমাৰ দাসে ছয় মাহৰ ভিতৰত অৰ্জুন মজুমদাৰক আঁতৰাম বুলি প্ৰতিশ্ৰুতি প্ৰদান কৰি আঁতৰোৱা নাছিল অৰ্জুন মজুমদাৰক৷ এটা আপত্তিজনক ভিডিঅ' ওলোৱাতহে অৰ্জুন মজুমদাৰে বাধ্যত পৰি পদত্যাগ কৰাত সভাপতিৰ দায়িত্ব দিলে চন্দন দেৱক৷ চন্দন দেৱক লৈও আপত্তি কৰিছিল শিবু মিশ্ৰ, শিলাদিত্য দেৱে৷ কিন্তু দলীয় নেতৃত্বই বিধায়ক দুগৰাকীৰ কথাত তিলমানো গুৰুত্ব দিয়া নাছিল৷

অকল ইমানেই নহয়, ছজন বিজেপি,পাঁচজন কংগ্ৰেছ আৰু এজন AIUDFৰ সদস্যৰে গঠন হোৱা জিলা পৰিষদতো শিলাদিত্য দেৱৰ ঘোৰ আপত্তি সত্ত্বেও একমাত্ৰ দলীয় নেতৃত্বৰ কৃপাত হস্তক্ষেপ অব্যাহত ৰাখিছিল অৰ্জুন মজুমদাৰে৷ অৰ্জুন মজুমদাৰে চলে–বলে–কৌশলে কংগ্ৰেছী নুৰ আহমেদক পাতিছিল জিলা পৰিষদৰ উপাধ্যক্ষ, অৱশ্যে নুৰ আহমেদে মঙলবাৰে পিন্ধিলে গেৰুৱা বসন৷

এনে বহুবোৰ কথাতে দলৰ বিশেষকৈ সাংগঠনিক সাধাৰণ সম্পাদক ফণীন্দ্ৰ নাথ শৰ্মাক টাৰ্গেট কৰি দল এৰাৰ মুকলি হুংকাৰ দিছিল বিধায়ক শিলাদিত্য দেৱে৷ অৱশ্যে ৰাষ্ট্ৰীয় সাধাৰণ সম্পাদৰ বি এল সন্তোষ, নেডাৰ আহ্বায়ক ড০ হিমন্ত বিশ্ব শৰ্মাকে ধৰি একাংশৰ মন্ত্ৰণাৰ পিছত এসপ্তাহৰ সময় লৈছে বিধায়ক শিলাদিত্য দেৱে৷