‘মই বোলে দেহ বিক্ৰী কৰি মাহে ৬০হাজাৰ টকা পাওঁ’...সাংস্কৃতিক সাংবাদিক অমিয় তালুকদাৰক কিয় ৰামপিটন শোধালে অভিনেত্ৰী প্ৰাঞ্জনা দত্তই?

‘এবছৰ ধৰি মোক শাৰীৰিক নিৰ্যাতন চলাই আহিছে, মোৰ শ্ব’ৰ সময়ত যে হাতখন ভঙা আছিল সেয়া সিয়ে ভাঙিছে, এবছৰে মোক শাৰীৰিক নিৰ্যাতন চলাই আহিছে ই।’ এটাৰ পিছত এটা বিস্ফোৰক অভিযোগেৰে ৰাজমুকুট থিয়েটাৰৰ গ্ৰীণ ৰুমত সাংস্কৃতিক সাংবাদিক অমিয় তালুকদাৰক প্ৰচণ্ড মাৰ–পিট অভিনেত্ৰী প্ৰাঞ্জনা দত্তৰ। কিছুদিন পূৰ্বে ভ্ৰাম্যমাণ থিয়েটাৰৰ ভিতৰচ’ৰাত সংঘটিত এই কাণ্ডই এতিয়া ৰাজ্যৰ সাংস্কৃতিক মহলত তীব্ৰ প্ৰতিক্ৰিয়াৰ সৃষ্টি কৰিছে। প্ৰাঞ্জনা দত্তৰ লগতে থিয়েটাৰৰ অন্য একাংশইও অমিয় তালুকদাৰক ইমানেই মাৰ শোধাইছে যে তালুকদাৰ ভালকৈ থিয় হ’ব পৰা নাই। ছচিয়েল মিডিয়াত ভাইৰেল হৈছে ইয়াৰ ভিডিও।

ৰামপিটন শোধাই থাকোতে অভিনেত্ৰীগৰাকীয়ে ফোঁপাই ফোঁপাই অভিযোগ কৰিছে অমিয় তালুকদাৰে তেওঁক দেহোপজীৱিনী আখ্যা দিয়াৰ কথা, কৈছে তেওঁৰ হাতখনো তালুকদাৰেই ভাঙিছে। অভিনেত্ৰীগৰাকীৰ আক্ৰমণাত্মক ভূমিকাৰ সমানে থিয়েটাৰৰ এজনে পাঠ কৰিছে এখন চুক্তিপত্ৰ। ভিডিওত শুনামতে অমিয় তালুকদাৰে যদিহে প্ৰাঞ্জনা দত্তক ভৱিষ্যতে একেদৰে অত্যাচাৰ কৰে তেনেহ’লে তেওঁৰ বিৰুদ্ধে অভিনেত্ৰীগৰাকীয়ে কঠোৰ ব্যৱস্থা গ্ৰহণ কৰিব পাৰিব।

কি কাৰণত অভিনেত্ৰীগৰাকীয়ে এনেদৰে ৰণচণ্ডী মূৰ্তি ধাৰণ কৰিলে আৰু দুয়োৰে মাজত সংঘাতৰ উৎপত্তি ক’ত সেই কথা সম্পূৰ্ণৰূপে পৰিষ্কাৰ হোৱা নাই যদিও এই ঘটনাক দুৰ্ভাগ্যজনক আখ্যা দিছে বিভিন্নজনে। সাংস্কৃতিক মহলৰ অৱশ্যে প্ৰায় সকলোৱে এই ঘটনাক লৈ নীৰৱ।

বিগত বৰ্ষত বৰদৈচিলা থিয়েটাৰত নাট্যকাৰ অভিজিৎ ভট্টাচাৰ্যৰ সৈতে সংঘাতক লৈ বিতৰ্কৰ কেন্দ্ৰবিন্দু হৈ পৰিছিল মঞ্চৰ শক্তিশালী অভিনেত্ৰীগৰাকী।

ভ্ৰাম্যমাণ থিয়েটাৰৰ দীঘলীয়া গৌৰৱোজ্জ্বল ইতিহাসক এনেধৰণৰ ঘটনাই কলুসিত কৰে বুলি আখ্যা দিছে সন্মানীয় উদ্যোগটোৰ সৈতে জৰিত নৱপ্ৰজন্মই। কেনেকৈ যিকোনো মানুহে থিয়েটাৰৰ ভিতৰত দপদপাবলৈ সুযোগ পায় বুলি প্ৰশ্ন কৰিছে নৱপ্ৰজন্মৰ সফল নাট্যকাৰ পল্লৱ পৱন বৰাই? অভিনেত্ৰী এগৰাকীক এবছৰ ধৰি শোষণ কৰাৰ ক্ষেত্ৰতো উদ্বেগ প্ৰকাশ কৰিছে নাট্যকাৰজনে।