৪ জ্যেষ্ঠ কংগ্ৰেছ নেতাৰ মাজৰ পৰাই হ'ব প্ৰদেশ কংগ্ৰেছৰ পৰৱৰ্তী সভাপতি, সুশান্ত বৰগোঁহাইৰ সন্দৰ্ভত গুৰুত্বপূৰ্ণ মন্তব্য ৰিপুণ বৰাৰ...

দুই এদিনতে ঘোষণা হ'ব প্ৰদেশ কংগ্ৰেছৰ পৰৱৰ্তী সভাপতিৰ নাম। কেন্দ্ৰীয় নেতৃত্বৰ সৈতে দিল্লীত আলোচনাত মিলিত হৈ শুকুৰবাৰে বিয়লি উভতি আহি  প্ৰাক্তন সভাপতি ৰিপুণ বৰাই বৰঝাৰস্থিত লোকপ্ৰিয় গোপীনাথ বৰদলৈ আন্তৰাষ্ট্ৰীয় বিমান বন্দৰত উপস্থিত হৈ এই মন্তব্য কৰে।

সভাপতিৰ দৌৰত ৪ জনৰ নাম থকা বুলি উল্লেখ কৰিলে যদিও সেই ৪জন জ্যেষ্ঠ কংগ্ৰেছীৰ নাম প্ৰকাশ কৰাৰ পৰা কৌশলপূৰ্ণ ভাবে আঁতৰি থাকে ৰিপুণ বৰা। বিশেষ সূত্ৰৰ খবৰ অনুসৰি, সভাপতিৰ দৌৰত আছে সাংসদ প্রদ্যুৎ বৰদলৈ আৰু প্ৰাক্তন বিধায়ক ভুপেন কুমাৰ বৰাৰ নাম।  আনহাতে পুনৰ সভাপতিৰ দায়িত্ব ল'বলৈ কেন্দ্ৰীয় নেতৃত্বই প্ৰস্তাৱ আগবঢ়াইছিল যদিও এই প্ৰস্তাৱ নাকচ কৰা বুলি জনাই ৰিপুণ বৰাই।

সেইদৰে সভাপতি নিৰ্বাচনত যথেষ্ট পলম হোৱা বুলি মন্তব্য কৰি যিসকল নেতাই কংগ্ৰেছ ত্যাগ কৰি বিজেপিত যোগদান কৰিলে, সেইসকলে নিজৰ স্বাৰ্থ সিদ্ধিৰ বাবেহে দল ত্যাগ কৰা বুলি সমালোচনা কৰে প্ৰদেশ কংগ্ৰেছৰ প্ৰাক্তন সভাপতিগৰাকীয়ে। আনহাতে কংগ্ৰেছ বিধায়ক সুশান্ত বৰগোঁহাই নিজে এটা সময়ত কংগ্ৰেছৰ সংসদীয় সচিব, জিলা সভাপতি আদিৰ দৰে দায়িত্বত থকাৰ পিছতো নেতৃত্বক দোষাৰোপ কৰি বিজেপিলৈ যাবলৈ ওলোৱাটো উচিত হোৱা নাই বুলি মন্তব্য কৰে বৰাই।