বাক্সাত ভয়ংকৰ ঘটনা! মোবাইলত ব্যস্ত থকাৰ বাবেই পিতৃয়ে ডিঙি কাটি হত্যা কৰিলে মাতৃহাৰা কন্যাক

বাক্সাত সংঘটিত হৈছে ভয়ংকৰ ঘটনা। মোবাইলত ব্যস্ত থকাৰ বাবেই ডিঙি কাটি কন্যাক হত্যা কৰিলে পিতৃয়ে ৷ বৰ্তমান আৰক্ষীয়ে গ্ৰেপ্তাৰ কৰিছে ঘাতক পিতৃক। আৰক্ষীৰ জেৰাত বৰ্তমান নিজৰ দোষ স্বীকাৰ কৰিছে পিতৃয়ে।

উল্লেখ্য যে, যোৱা ১৩ ছেপ্তেম্বৰত দিন দুুুুপৰতে বাক্সা জিলাৰ ১ নং সোণাপুৰত সংঘটিত হৈছিল এক জঘন্য হত্যাকাণ্ড ৷ ঘৰত কোনো নথকাৰ সুযোগ লৈ ডিঙি কাটি হত্যা কৰিছিল শ্যামল ব্ৰহ্মৰ কন্যা ৰিংখাং ব্ৰহ্মক ৷ সেই সময়ত কন্যাৰ হত্যাকাণ্ডত প্ৰাক্তন প্ৰেমিক জড়িত থকাৰ কথা আৰক্ষীৰ আগত কৈছিল পিতৃৃ শ্যামল ব্ৰহ্মই ৷ কিন্তু বাক্সা আৰক্ষীৰ জেৰাত শনিবাৰে পোহৰলৈ আহে প্ৰকৃত ঘটনা।

১নং সোণাপুৰৰ নিজ বাসগৃহত ১৩ ছেপ্তেম্বৰৰ দিনা ৰিংখাং ব্ৰহ্ম আছিল অকলে ৷ অনবৰতে কন্যা ৰিংখাং ব্যস্ত আছিল মোবাইল ফোনত ৷ কোনো কথা নুশুনিছিল পিতৃ শ্যামলৰ ৷ ফলত ক্ষুব্ধ হৈ পিতৃ শ্যামলে চোকা অস্ত্ৰৰে ডিঙি কাটি হত্যা কৰিছিল কিশোৰীগৰাকীক ৷ ইতিমধ্যে সমস্ত ঘটনা শ্যামল ব্ৰহ্মই আৰক্ষীৰ ওচৰত স্বীকাৰ কৰা বুলি জিলা আৰক্ষীৰ অতিৰিক্ত অধীক্ষক লামহাও ডংগলে জানিবলৈ দিছে ৷

ইফালে কন্যা হত্যাৰ অপৰাধত দোষী সাব্যস্ত হোৱা শ্যামল ব্ৰহ্মক আজি আৰক্ষীয়ে গ্ৰেপ্তাৰ কৰে। ব্ৰহ্মক গ্ৰেপ্তাৰ কৰাৰ পিছতে উত্তেজিত হৈ পৰে স্থানীয় ৰাইজ। আৰক্ষীয়ে বিনা দোষত শ্যামল ব্ৰহ্মক অপৰাধী সজাইছে বুলি অভিযোগ একাংশৰ।