HSLC Exam: SEBAৰ সংস্কাৰ কেতিয়া? সংস্কাৰ আয়োগক লৈ কি ক'লে ছেবাৰ প্ৰাক্তন অধ্যক্ষই 

SEBAত সংস্কাৰৰ দাবী এতিয়াৰ নহয় ৷ ৰাজ্যৰ হাইস্কুলীয়া শিক্ষা ব্যৱস্থাৰ মূল নীতি-নির্ধাৰক ছেবাৰ পাঠ্যক্রম, পৰীক্ষা পদ্ধতিৰ লগতে ইয়াৰ সাংগঠনিক সংস্কাৰৰ বাবে সময়ে সময়ে আয়োগো গঠন হৈ আহিছে ৷ পিছে কেতিয়াবা যদি এনে আয়োগৰ পৰামৰ্শ চৰকাৰে গ্ৰহণ কৰি তাৰ ওপৰত কাৰ্যব্যৱস্থা হাতত লোৱা নাই আৰু আন কেতিয়াবা এনে আয়োগক ছেবাৰে জড়িত লোকেই নস্যাৎ কৰা দেখা যায় ৷ এইবাৰ বিজ্ঞান পৰীক্ষাৰ প্ৰশ্নকাকত ফাদিলৰ পিছত পৰীক্ষা বাতিল কৰা ঘটনাৰ পিছত পুনৰ আয়োগ গঠনৰ পোষকতা বিভিন্নজনে কৰিছে ৷ পিছে এই আয়োগৰ ওপৰত একেবাৰেই বিশ্বাস নাই ছেবাৰ প্ৰাক্তন অধ্যক্ষ শান্তিকাম হাজৰিকাৰ ৷

"আয়োগৰ তিনিওখন প্ৰতিবেদনকে মই নস্যাৎ কৰিছোঁ ৷ কোনো কথাই গভীৰতালৈ চোৱা নাই, কোনো কথাৰে সঠিক অনুসন্ধান কৰা নাই ৷ পৰীক্ষাৰ পিছত দিলীপ বৰুৱা আয়োগক সবিশেষ দিয়া হৈছিল ৷ কিন্তু কথাবোৰ গুৰুত্ব সহকাৰে দিলীপ বৰুৱা আয়োগে লোৱা নাছিল ৷ অমূক-তমূকৰ কথা শুনি কাম কৰিছিল আয়োগখনে ৷ এখন আয়োগেও ভালকৈ কাম কৰা নাছিল ৷ সংস্কাৰ বিচাৰিবলৈ হ'লে সেই ভাৱমূৰ্তি লৈ আগবাঢ়িব লাগিব ৷ নকল ৰোধৰ কাৰনে আয়োগে কি কৈছিল জানেনে, কঠোৰ আইন আনিব লাগিব বুলি এটা লাইন লিখি বহি আছিল ৷ এয়া জানো মূল কথা ৷ সংস্কাৰ ছেবাৰ ভিতৰতে হ'ব লাগিব ৷ মিলিজুলি কৰা এটা ক্ৰাইম এয়া ৷ ছেবাতে বহী চোৱাৰ যি প্ৰক্ৰিয়া সেয়া বন্ধ নহ'লে এইবোৰ চলি থাকিব ৷" এইদৰে কয় শান্তিকাম হাজৰিকাই

উল্লেখ্য যে, শান্তিকাম হাজৰিকাৰ কাৰ্যকালতে গঠন হৈছিল শ্ৰীনাথ বৰুৱা আয়োগো ৷ প্ৰাক্তন অধ্যক্ষ গৰাকীৰ মতে এতিয়া টাস্ক ফ'ৰ্চ গঠনৰহে প্ৰয়োজন আছে ৷ "Task force লাগে এতিয়া ৷ National Education Policy হ'ল বুলি হাত সাৱতি বহি থাকিলে নহ'ব ৷" লগতে এইখিনিও সংযোগ কৰিলে প্ৰাক্তন অধ্যক্ষ গৰাকীয়ে ৷ ইফালে ছেবাৰ সংস্কাৰ এগৰাকী অসমীয়া হিচাপে সহৃদয়তাৰে বিচাৰে বুলি ক'লে শাসকীয় বিজেপি বিধায়ক দিগন্ত কলিতাই ৷ "আমি দুখ পাইছোঁ ৷ চৰকাৰখন এই দুখৰ সমভাগী ৷ মুখ্যমন্ত্ৰী গৰাকী অহালৈ আমি বাট চাইছোঁ ৷ ছেবাৰ সংস্কাৰ এগৰাকী অসমীয়া হিচাপে আন্তৰিকতাৰে বিচাৰিছোঁ ৷" ক'লে কমলপুৰ সমষ্টিৰ বিধায়ক দিগন্ত কলিতাই ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।