মোগলৰ আক্ৰমণ চলিছে অসমত, সকলোৱে এক হৈ বিদেশী খেদিব লাগিবঃ মুখ্যমন্ত্ৰী সোণোৱাল

২০২১ৰ নিৰ্বাচনলৈ মাজত মাত্ৰ কেইটামান দিন বাকী। নিৰ্বাচনৰ বাবে এতিয়া পূৰ্ণ পৰ্যায়ত প্ৰস্তুতি চলাইছে ৰাজ্যৰ শাসক-বিৰোধীয়ে। প্ৰতিদিনাই সলনি হৈছে ৰাজ্যৰ ৰাজনৈতিক দৃশ্যপট। শুকুৰবাৰে গুৱাহাটীৰ শ্ৰীমন্ত শংকৰদেৱ কলাক্ষেত্ৰত অনুষ্ঠিত হয় বিজেপিৰ যোগদান কাৰ্যসূচীত। যোগদান কাৰ্যসূচীত অংশগ্ৰহণ কৰে ৰাজ্যৰ মুখ্যমন্ত্ৰী সৰ্বানন্দ সোণোৱালে।

নিৰ্বাচনৰ প্ৰাক মুহূৰ্তত আকৌ মুখ্যমন্ত্ৰী সৰ্বানন্দ সোণোৱালৰ মুখত শুনিবলৈ পোৱা গ’ল বিদেশী বহিষ্কাৰৰ কথা। ভাষণ প্ৰসংগত মুখ্যমন্ত্ৰী সোণোৱালে কয় যে, ৰাজ্যত মোগলৰ আক্ৰমণ অব্যাহত আছে। আজি অসমত খিলঞ্জীয়া সংকটত, মাটিৰ অধিকাৰ হেৰুৱাইছে খিলঞ্জীয়াই। নিজৰ অস্তিত্ব ৰক্ষাৰ বাবে বীৰ লাচিতৰ দৰে মোগলৰ বিৰুদ্ধে যুঁজিব লাগিব।
সকলোৱে একত্ৰিত হৈ বিদেশীক খেদিব লাগিব।’ মুখ্যমন্ত্ৰীগৰাকীয়ে লগতে ৰাজ্যত বিজেপিৰ কাৰ্যকৰ্তাৰ সংখ্যা ৪২ লাখৰ পৰা ৫২ লাখলৈ বৃদ্ধি পাব বুলিও মন্তব্য কৰে।’

আনহাতে সভাত উপস্থিত থাকি মন্ত্ৰী হিমন্ত বিশ্ব শৰ্মায়ো তীব্ৰ আক্ৰমণ কৰে এটা বিশেষ সম্প্ৰদায়ক।মন্ত্ৰী শৰ্মাই আজমলৰ সভাত আৰবী ভাষা ব্যৱহাৰৰ সন্দৰ্ভত কয় যে,আজমলৰ সভাত উৰ্দু আৰু আৰবীক ভাষা ব্যৱহাৰ কৰা হৈছে কিন্তু কোনেও প্ৰতিবাদ কৰা নাই।কৰবাত যদি বাঙালী আৰু বড়োভাষাৰ ব্যৱহাৰত বেমেজালী হয় তেতিয়া সকলো জাঙুৰ খাই উঠে। বাঁওপন্থীসকলে অসমত সংঘাত লগাইছে।অসমত আজি সভ্যতাৰ যুঁজ আৰম্ভ হৈছে।
এনেকৈ থাকিলে ১০ বছৰৰ পিছত আজমলে সিদ্ধান্ত লব অসমত কি হব।’