সামান্য কথাতে হাজোৰ পাচলি ব্যৱসায়ী সনাতন ডেকাক নৃশংস হত্যা, অভিযুক্ত ফাইজুল আলী আৰু গেং পলাতক

নীল–অভিৰ জঘন্য হত্যাকাণ্ডৰ অপৰাধীয়ে শাস্তি নৌপাওতেই এইবাৰ তীৰ্থনগৰী হাজোত সংঘটিত অনুৰূপ হত্যাকাণ্ডই প্ৰতিক্ৰিয়াৰ জোৱাৰ তুলিছে। দৰিদ্ৰ পাচলি ব্যৱসায়ী সনাতন ডেকাক বিনাদোষত ৫জনকৈ লোকে মৰিয়াই হত্যা কৰাৰ ঘটনাই জোকাৰিছে ৰাজ্য। হাজোৰ সমীপৰ মানাহকুচিত সংঘটিত হৈছে এই বৰ্বৰ হত্যাকাণ্ড। ফাইজুল আলী নামৰ এজন উদণ্ড ব্যক্তি আৰু তেওঁৰ সংগীয়ে সনাতন ডেকাক বেয়াকৈ আক্ৰমণ কৰাৰ ফলত ডেকাৰ মৃত্যু ঘটাৰ অভিযোগ।

প্ৰকাশ কৰা মতে, তেতেলীয়া গাঁৱৰ সনাতন ডেকাই এটা ফেক্টৰীত কাম কৰিছিল কিন্তু লকডাউনত ফেক্টৰী বন্ধ হৈ থকাত চাইকেলত পাচলি বিক্ৰী কৰি আৰ্থিক দুৰৱস্থাৰে যুঁজ দিয়াৰ চেষ্টা কৰিছিল।

অভিযোগ মতে, এনেকৈ পাচলি বিক্ৰী কৰি থকা অৱস্থাত দুৰ্ঘটনাৱশতঃ সনাতন ডেকাৰ চাইকেলখনে এখন গাড়ীত খুন্দা মাৰে যিখন গাড়ীত ফাইজুল আলী আৰু লাজলিল আলী নামৰ ব্যক্তিদুজনে ভ্ৰমণ কৰিছিল। খঙত একো নাই হৈ সনাতন ডেকাক দুয়ো মাৰপিট কৰিবলৈ আৰম্ভ কৰে। গাড়ীত লগা সামান্য দাগটোত ইমানেই ৰুষ্ট হৈ পৰে যে দুয়ো সনাতন ডেকাক মাৰিবলৈ আৰু কেইবাজনো ব্যক্তিক মাতি আনে। সেইমতে সবিৰ আলী, ইউছুব আলী আৰু ফিৰজাহান আলী ঘটনাস্থলীত উপস্থিত হৈ দুৰ্ভগীয়া পাচলি ব্যৱসায়ী জনক ইমানেই বেয়াকৈ মাৰ ধৰ কৰি তাতেই পেলাই থৈ সেই ঠাই ত্যাগ কৰে আটাইকেইজনে। স্থানীয় ৰাইজে সনাতন ডেকাক হাস্পতালত ভৰ্তি কৰায় যদিও তেওঁ এঘণ্টাৰ ভিতৰতে প্ৰাণ ত্যাগ কৰে।

জানিব পৰা মতে, মূল অভিযুক্ত ফাইজুল আলী এজন অগপ নেতাৰ ভাতৃ। হাজো আৰক্ষীয়ে ইতিমধ্যে এই সন্দৰ্ভত এক গোচৰ ৰুজু কৰিছে আৰু তদন্ত অব্যাহত ৰাখিছে। আৰক্ষীয়ে অপৰাধীৰ সন্ধান অব্যাহত ৰাখিছে।