আতংক নহয়, কোৰোণা ৰোগীয়ে হৰিনামেৰে মুখৰ কৰিলে বৰপেটা মেডিকেল কলেজ হাস্পতাল

সত্ৰ নগৰী বৰপেটাবাসীয়ে সদায় বহন কৰে একক, অনন্য, সুকীয়া পৰিচয়৷ সত্ৰীয়া পৰম্পৰাক জীৱনৰ সৈতে জড়িত কৰি সদায়েই গুৰুজনাক অন্তৰত লৈ জীৱন–যাপন কৰে বৰপেটাবাসীয়ে৷ সুখতো, দুখতো সৰ্বদা গুৰুজনাৰ নাম প্ৰতিজন বৰপেটীয়াৰ মুখত৷ বৰপেটা মেডিকেল কলেজ হাস্পতালত কোনোণা ৰোগীসকলে সৃষ্টি কৰিলে এক অনন্য পৰিৱেশৰ। হাস্পতালখনৰ কোভিড ইউনিটত নাই কোনো আতংকৰ পৰিৱেশ। তাৰ পৰিৱৰ্তে, হৰিনামেৰে মুখৰিত হৈছে বৰপেটা মেডিকেল কলেজ হাস্পতালৰ কোভিড ৱাৰ্ড৷

কোৰোণাত আক্ৰান্ত ৰোগীসকলে সদায় যোগ–প্ৰাৰ্থনা, গীত–মাতেৰে নিজক আনন্দত ৰখাৰ লগতে কোৰোণাক জয় কৰাৰ চেষ্টা অব্যাহত ৰাখিছে৷ প্লাষ্টিকৰ বাল্টি, প্লাষ্টিকৰ বটল, কাহী–বাতি আধিৰে বাদ্য বজাই গাইছে হৰি নাম৷ এই দৃশ্যই প্ৰমাণ কৰে বৰপেটাৰ লোক য'তেই নাথাকক, য'লৈকে নাযাওক, সুখ দুখ, আনন্দ–বিষাদ,  সকলোতে সত্ৰীয়া পৰম্পৰা, হৰি নাম আৰু দুজনা গুৰুক কঢ়িয়াই লৈ ফুৰে অন্তৰত৷