ULFA–I leader Jiban Moran : ১৯৮৪ চনতে আলফাত যোগদান, কাচিনলৈ যোৱা দ্বিতীয়টো দলৰ অন্যতম সদস্য আছিল সদ্যপ্ৰয়াত জীৱন মৰাণ

৩৭টা বছৰ আলফাৰ সশস্ত্ৰ বিপ্লৱত জীৱন কটাই স্বাস্থ্যজনিত কাৰণত সাধাৰণ জীৱনলৈ ২০২১ৰ এপ্ৰিলত ঘূৰি অহা জীৱন মৰাণে শনিবাৰে সন্ধিয়া শেষ নিশ্বাস ত্যাগ কৰে ৷ প্ৰায় এমাহ কাল গুৱাহাটীত চিকিৎসাধীন হৈ থকা জীৱন মৰাণৰ মৃত্যুত গভীৰ শোক প্ৰকাশ কৰিছে আলফা স্বাধীনে আৰু মৰাণক অসম মৃতক হিচাপে ঘোষণা কৰে ৷



জীৱন মৰাণে শনিবাৰে সন্ধিয়া গুৱাহাটীৰ এপলো হাস্পতালত শেষ নিশ্বাস ত্যাগ কৰে (Senior ULFA–I leader Jiban Moran passes away)৷ ১৯৮৪ চনতে সংযুক্ত মুক্তি বাহিনী, অসম চমুকৈ আলফাত যোগ দিয়া জীৱন মৰাণ ওৰফে গুণৎ ডাঙৰীয়া আছিল সংগঠনটোৰ দ্বিতীয়টো কাচিনলৈ যোৱা দলৰ অন্যতম সদস্য ৷ নিষিদ্ধ ঘোষিত বিদ্ৰোহী সংগঠনটোৰ বিভিন্ন পদবীত কাৰ্যনিৰ্বাহ কৰি শেষ সময়ত সংগঠনৰ বিত্ত সচিব আৰু ভাৰপ্ৰাপ্ত সাধাৰণ সম্পাদকৰ দায়িত্বত আছিল ৷

২০১১ত বাংলাদেশত সংগঠনটোৰ কেন্দ্ৰীয় নেতৃত্বক আটক কৰি ভাৰত চৰকাৰৰ হাতত গটাই দিয়াৰ পিছত পৰেশ বৰুৱাৰ কাষত থিয় হোৱা একমাত্ৰ শীৰ্ষ নেতাজনেই আছিল জীৱন মৰাণ ৷



আলফাৰ পৰা পৰেশ বৰুৱা নেতৃত্বাধীন আলফা স্বাধীনক নিশকতীয়াৰ পৰা সবল কৰাত পৰেশ বৰুৱাক সংগ দিয়া জীৱন মৰাণৰ মৃত্যুত গভীৰ শোক প্ৰকাশ কৰে আলফা স্বাধীনৰ মুৰব্বী পৰেশ বৰুৱাই ৷ গভীৰ শোক প্ৰকাশ কৰি বৰুৱাই সদ্যপ্ৰয়াত জীৱন মৰাণক অমৰ মৃতক হিচাপে ঘোষণা কৰে ৷ উল্লেখযোগ্য যে বিগত বৰ্ষৰ এপ্ৰিলত স্বাস্থ্যজনিত কাৰণত আলফা স্বাধীনৰ পৰা অব্যাহতি লৈ ঘৰলৈ উভতি আহিছিল মৰাণ ৷



দুমাহ পূৰ্বে News18ৰে হোৱা এক আছুতীয়া সাক্ষাৎকাৰত আলফা স্বাধীনৰ নেতাজনে কৈছিল— “যিমানখিনি পাৰিছিলোঁ, সিমানখিনি মই মনে প্ৰাণে সংগঠনৰ বাবে কৰিছিলোঁ ৷ সংগঠনৰ বিপদ কালত পৰেশ বৰুৱাৰ সৈতে থাকি আমি সংগঠনক পুনৰ শক্তিশালী কৰিছিলোঁ ৷ বহু বাধাবিঘিনিৰ মাজেৰে আমি আগবাঢ়িবলগীয়া হৈছিল ৷ শেষত মই মোৰ স্বাস্থ্য ভাঙি পৰাত সংগঠনৰ পৰা অব্যাহতি ল'বলগীয়া হ'ল ৷”
মৃত্যুৰ সময়ত বিদ্ৰোহী নেতাজনে পত্নী আৰু দুই কন্যাক ইহসংসাৰত এৰি যায় ৷