পৰেশ বৰুৱাৰ ULFA-Iৰে কেনেকৈ হ'ব চৰকাৰৰ আলোচনা? মুখ্যমন্ত্ৰীৰ মধ্যম পন্থাৰ সন্ধান দিলে হিৰণ্য শইকীয়াই 

সাৰ্বভৌমত্ব অবিহনে আলোচনাত বহিবলৈ সদায় অস্বীকাৰ কৰা পৰেশ বৰুৱা নেতৃত্বাধীন আলফা স্বাধীনক কেনেদৰে আলোচনাৰ মেজলৈ সন্মানজনক ভাৱে আনিব চৰকাৰে ? এইক্ষেত্ৰত মধ্যম পন্থাৰ পোষকতা কৰা মুখ্যমন্ত্ৰী ড° হিমন্ত বিশ্ব শৰ্মালৈ সঁহাৰি জনালে পূৰ্বৰ PCG সদস্য হিৰণ্য শইকীয়াই ৷

পূৰ্বৰ PCGৰ অন্যতম সদস্য হিৰণ্য শইকীয়াই মধ্যম পন্থাৰ প্ৰতি সঁহাৰি জনাই News18ক ক'লে- “সংশোধনী আনক ভাৰতীয় সংবিধানত ৷ সংবিধান সংশোধন কৰি সংযোজন কৰক সাৰ্বভৌমত্বৰ বিকল্প ব্যৱস্থাৰ ৷ সাৰ্বভৌমত্বৰ বিকল্প ব্যৱস্থাৰ জৰিয়তে সুৰক্ষিত কৰক অসম আৰু অসমীয়া ৰাজনৈতিক অধিকাৰক ৷”

ইতিমধ্যে আলফা (স্বাধীন) আৰু চৰকাৰৰ আলোচনাকলৈ ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাই গ্ৰহণ কৰিছে ইতিবাচক পদক্ষেপ ৷ পূৰ্বৰ অসমৰ মুখ্যমন্ত্ৰীসকলৰৰ বিপৰীত স্থিতিত বৰ্তমানৰ ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাই অৱস্থান গ্ৰহণ কৰিছে বুলি উল্লেখ কৰে হিৰণ্য শইকীয়াই ৷ শইকীয়াই ক'লে- “মুখ্যমন্ত্ৰী ড° শৰ্মাৰ স্থিতি দিল্লীত এটা, অসমত এটা নহয় ৷ আগৰ মুখ্যমন্ত্ৰীসকলে দিছপুৰত এটা কৈছিল আৰু দিল্লীত আন এটা স্থিতি গ্ৰহণ কৰা দেখা গৈছিল ৷ কিন্তু বৰ্তমানৰ মুখ্যমন্ত্ৰী ড° হিমন্ত বিশ্ব শৰ্মাই একেটাই স্থিতি গ্ৰহণ কৰা দেখা গৈছে দিল্লী আৰু দিছপুৰত ৷”

উল্লেখযোগ্য যে আলফা (স্বাধীন)ৰ আলোচনাৰ মূল চৰ্ত হ'ল সাৰ্বভৌমত্বৰ ওপৰত আলোচনা। চাৰি দশক ধৰি সশস্ত্ৰ সংগ্ৰাম চলাই যোৱা পৰেশ বৰুৱা নেতৃত্বাধীন আলফা (স্বাধীন)এ এৰা নাই সাৰ্বভৌমত্বৰ দাবী ৷ ইয়াৰ বিপৰীতে সাৰ্বভৌমত্ব ৰক্ষাৰ শপত লোৱা জনপ্ৰতিনিধিও এৰিব নোৱাৰে সাৰ্বভৌমত্বক ৷  দিল্লীত কেন্দ্ৰীয় গৃহমন্ত্ৰী অমিত শ্বাহ আৰু ৰাষ্ট্ৰীয় নিৰাপত্তা উপদেষ্টা অজিত ডোভালক সাক্ষাৎ কৰাৰ পিছত মুখ্যমন্ত্ৰী ড° হিমন্ত বিশ্ব শৰ্মাই দুয়োপক্ষৰ সন্মানজনক স্থিতিৰ বাবে মধ্যম পন্থা উলিয়াবলৈ বিচাৰিছে বুলি সদৰী কৰিছে ৷

এনে সময়ত 'সাৰ্বভৌমত্ব'ৰ বিষয়টোৰ বিকল্প কি হ'ব? পূৰ্বৰ PCG সদস্য হিৰণ্য শইকীয়াই এই সন্দৰ্ভত ক'লে- “সংখ্যালঘুত পৰিণত হ'বলৈ আগবঢ়া অসমীয়াৰ বাবে লাগিব খিলঞ্জীয়াৰ ৰাজনৈতিক অধিকাৰ ৷ অসমৰ মাটি আৰু অৰ্থনৈতিক সম্পদৰ ওপৰত থাকিব লাগিব প্ৰভুত্ব। তেনে বিকল্প ব্যৱস্থাৰে আগবাঢ়িলে নিশ্চয় মধ্যম পন্থাৰ সন্ধান পোৱা যাব ৷"

প্ৰযোজনত ভাৰতৰ নমনীয় সংবিধান ব্যৱস্থাৰ এক সংশোধনীৰ প্ৰয়োজন আছে বুলি দাবী কৰে হিৰণ্য শইকীয়াই ৷ শইকীয়াই লগতে আছুতীয়াকৈ এক বিশেষ অনুসূচী সন্নিবিষ্ট কৰাৰো দাবী কৰে ৷

এতিয়া সময়ে নিৰ্ণয় কৰিব কোন দিশে আগবাঢ়ে আলোচনাৰ প্ৰক্ৰিয়া ৷ যিটোক মুখ্যমন্ত্ৰী ড° হিমন্ত বিশ্ব শৰ্মাই যথেষ্ট গুৰুত্বসহকাৰে গ্ৰহণ কৰিছে ৷

অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|