'সাৰ্বভৌমত্ব পৰেশ বৰুৱাইয়ো এৰিব নোৱাৰে, আমিও ধৰিব নোৱাৰো'-পৰেশ বৰুৱাৰ সৈতে আলোচনাৰ বাবে মধ্যম পন্থাৰ পোষকতা মুখ্যমন্ত্ৰী ড° হিমন্ত বিশ্ব শৰ্মাৰ

বহু চৰ্চিত আলফা স্বাধীন আৰু চৰকাৰৰ আলোচনাৰ প্ৰক্ৰিয়া সন্দৰ্ভত কেতবোৰ ইতিবাচক ইংগিত দিলে মুখ্যমন্ত্ৰী ড° হিমন্ত বিশ্ব শৰ্মাই ৷ দিল্লী ভ্ৰমণ সামৰি অসমলৈ উভতি অহাৰ পূৰ্বে মুখ্যমন্ত্ৰী ড° শৰ্মাই মধ্যম পন্থাৰ জৰিয়তে পৰেশ বৰুৱা নেতৃত্বাধীন আলফা স্বাধীনক আলোচনাৰ মেজলৈ সন্মানজনকভাৱে অনাৰ পোষকতা কৰে ৷

সাংবাদিকৰে নতুন দিল্লীত হোৱা বাৰ্তালাপত শনিবাৰে মুখ্যমন্ত্ৰী ড° হিমন্ত বিশ্ব শৰ্মাই ক'লে- “পৰেশ বৰুৱা নেতৃত্বাধীন আলফা স্বাধীনৰ সৈতে সন্মানজনক আলোচনাৰ পথ উলিয়াবলৈ চেষ্টা কৰি থকা হৈছে ৷ বহুকেইজন ব্যক্তিয়ে এই বিষয়ত কাম কৰি আছে ৷ পৰেশ বৰুৱাৰ সৈতেও তেওঁলোকে কথা পাতি আছে আৰু মোৰ সৈতেও কথা পাতি আছে ৷ মই নিজেও দিল্লীৰ সৈতে এই বিষয়ত কথা পাতি আছো ৷”

সাৰ্বভৌমত্বৰ বিষয়ত নিজ  স্থিতিত দীৰ্ঘদিন ধৰি অটল হৈ থকা পৰেশ বৰুৱাৰ সন্দৰ্ভত মুখ্যমন্ত্ৰী ড° শৰ্মাই ক'লে- “ পৰেশ বৰুৱাই সাৰ্বভৌমত্বৰ বিষয়ত আলোচনা বিচাৰি আছে দীৰ্ঘদিনৰে পৰা ৷ আমিও সাৰ্বভৌমত্ব ৰক্ষাৰ শপত খাই মুখ্যমন্ত্ৰী হৈছো, জনপ্ৰতিনিধি হৈছো ৷ আমি সাৰ্বভৌমত্বক লৈ কথা পাতিব নোৱাৰেো ৷ এতিয়া মই পৰেশ বৰুৱাক ক'ব নোৱাৰো যে, আপুনি সাৰ্বভৌমত্বক এৰি আলোচনালৈ আহক ৷ তেওঁ গোটেই জীৱন এই বিষয়ক লৈয়ে চলি আছে ৷ এতিয়া মই কিয় তেওঁক সাৰ্বভৌমত্ব এৰক বুলি ক'ম ৷ আমিও সাৰ্বভৌমত্বক লৈ কথা পাতিব নোৱাৰো ৷ আমি দুয়োপক্ষই দুয়োপক্ষৰ বাধ্যবাধকতাক বুজিব লাগিব ৷ বুজাবুজিৰ ভিত্তিত আমি সমাধানৰ পথ উলিয়াব লাগিব, মধ্যম পন্থা উলিয়াব লাগিব ৷”

উল্লেখযোগ্য যে মুখ্যমন্ত্ৰীয়ে শেহতীয়া দিল্লী ভ্ৰমণত কেন্দ্ৰীয় গৃহমন্ত্ৰী অমিত শ্বাহ আৰু ৰাষ্ট্ৰীয় নিৰাপত্তা উপদেষ্টা অজিত ডোভালৰ সৈতে এই বিষয়ত বিস্তৃতভাৱে আলোচনা কৰা বুলি জানিব পৰা যায় ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।