চৰাইদেউ জিলাৰ মাহমৰাত পিষ্টলসহ দুই যুৱক আটক, কি উদ্দেশ্যৰে আনিছিল পিষ্টল?

চৰাইদেউ জিলাৰ কাকতীবাৰী আৰক্ষী থানাৰ অন্তৰ্গত কাকতীবাৰী ট্ৰলী আলি অঞ্চলৰ পৰা বুধবাৰে সন্ধিয়া অস্ত্ৰসহ দুজন যুৱকক আৰক্ষী আৰু অসম ৰাইফলছে আটক কৰে। আৰক্ষী সূত্ৰৰ পৰা জানিব পৰা অনুসৰি, আৰক্ষী আৰু অসম ৰাইফলছৰ এটা দলে গোপন সূত্ৰে এখন ডাম্পাৰত অস্ত্ৰসহ দুজন যুৱক আহি থকা বুলি লাভ কৰে। সেই খবৰৰ ভিত্তিত সোণাৰি আৰক্ষী আৰক্ষী আৰু অসম ৰাইফলছৰ এটা দলে  কাকতীবাৰী ট্ৰলী আলিত তালাচী চলায়।

কাকতীবাৰী-টিমন-ৰাজগড় পথেৰে সন্ধিয়া প্ৰায় ৮ বজাত ৰাজগড়ৰ পৰা কাকতীবাৰী অভিমুখে আহি থকা তিনিখন ডাম্পাৰত তালাচী চলোৱাৰ সময়তে এটা .২২ পিষ্টলসহ দুজন যুৱকক অভিযানকাৰী দলটোৱে আটক কৰিবলৈ সক্ষম হয়।

অভিযানকাৰী দলটোৱে আটক কৰা যুৱক দুজন হৈছে চৰাইদেউ জিলাৰ কাকতীবাৰী আৰক্ষী থানাৰ অন্তৰ্গত টিমন হাতীবন্ধা গাঁৱৰ জানমণি ওৰফে জোন ওৰফে অজিত ওৰফে ধনীৰাম বৰা (২৪) আৰু তিনিচুকীয়া জিলাৰ পেঙেৰীৰ কামাখ্যা মৰাণ (২৬)। ঘটনা সন্দৰ্ভত কাকতীবাৰী আৰক্ষী থানাত ২৬/২০২০ নম্বৰত এটা গোচৰ ৰুজু কৰিছে ।

উল্লেখ্য যে আটকাধীন  যুৱক দুজনৰ ভিতৰৰ কাকতীবাৰী হাতীবন্ধা গাঁৱৰ জানমণি ওৰফে  ধনীৰামৰ বিৰুদ্ধে পূৰ্বে কেইবাটাও অপৰাধজনিত গোচৰ কাকতীবাৰী থানাত ৰুজু হৈ আছে।