শোণিতপুৰত এসপ্তাহৰ ভিতৰতে দুুটাকৈ বন্যহস্তীৰ মৃত্যু

শোণিতপুৰ জিলাত মৃত্যু হৈছে এটাৰ পাছত আন এটা বন্যহস্তীৰ৷ খাদ্য সন্ধানত বনাঞ্চলৰ পৰা জনবসতিপূৰ্ণ অঞ্চললৈ ওলাই আহিছে বন্যহস্তীৰ জাক৷ বিগত এসপ্তাহৰ ভিতৰতে দুটাকৈ বন্যহস্তীৰ মৃত্যু হৈছে৷ ৬ অক্টোবৰত ৰঙাপৰাৰ হাতীবাৰী চাহ বাগিচাৰ ২নং চেকচনত এটা ডেৰ মহীয়া বন্যহস্তীৰ পোৱালি নলাত পৰি মৃত্যু হৈছিল৷ খাদ্যৰ সন্ধানত  মাতৃৰ সৈতে  ওলাই অহিছিল হাতীৰ পোৱালিটো ৷ কিন্ত বাগিচাৰ নলাত পৰি মৃত্যু হয় পোৱালিটোৰ।

হাতীৰ পোৱালিটোৰ মৃত্যুৰ চাৰিদিন পিছতে চাৰিদুৱাৰ তৰাজানৰ এখন ধাননি পথাৰৰ মাজত মৃত অৱস্থাত উদ্ধাৰ হয় এটা বন্যহস্তী৷ বালিপৰা সংৰক্ষিত বনাঞ্চলৰ পৰা খাদ্যৰ সন্ধানত ওলাই আহিছিল বন্যহস্তীটো৷

একেদৰে বন্যহস্তীৰ আক্ৰমণত দুজনকৈ লোকে প্ৰাণ হেৰুৱাইছে৷ একাংশ বনদস্যুৱে বনাঞ্চল কাটি তহিলং কৰাৰ ফলত এতিয়া খাদ্যৰ অভাৱত জনবসতিপূৰ্ণ অঞ্চললৈ ওলাই অহা বন্যহস্তীৰ জাকে সন্ত্ৰাসৰ সৃষ্টি কৰি আহিছে৷ বনাঞ্চলৰ পৰা ওলাই অহা হাতীৰ জাকে গাঁও অঞ্চলত প্ৰৱেশ কৰি কৃষক ৰাইজৰ ধাননি পথাৰ তহিলং কৰিছে৷

একেদৰে বন্যহস্তীৰ কেইবাটাও জাক ৰঙাপৰা বাগিচা অঞ্চলত বৰ্তমানে বিচৰণ কৰি আছে৷ বন্যহস্তীয়ে প্ৰতিদিনে বাগিচাৰ শ্ৰমিক ৰাইজৰ ঘৰ-দুৱাৰ ভাঙি সন্ত্ৰাসৰ সৃষ্টি কৰি আহিছে৷ যাৰ বাবে বাগিচা অঞ্চলৰ শ্ৰমিক ৰাইজ শংকিত হৈ পৰিছে৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।