ৰাজ্যত আধাৰ কাৰ্ডৰ ক'লা বজাৰ, ঢেকীয়াজুলিত আধাৰৰ নামত অবৈধভাৱে ধন লোৱাৰ অভিযোগত দুজনক আটক

আধাৰ কাৰ্ডৰ নামত ৰাজ্যত চলিছে বৃহৎ ক'লা বজাৰ৷ শোণিতপুৰৰ ঢেকীয়াজুলিৰ বিভিন্ন প্ৰান্তত কেইবাটাও স্থানত আধাৰ কাৰ্ড বনোৱাৰ নামত চলিছে অবাধ লুণ্ঠন৷ বিনামূলীয়াকৈ আধাৰ কাৰ্ড প্ৰদান নকৰি একাংশ লোকে চলাইছে লুণ্ঠন৷ অভিযোগ অনুসৰি, আধাৰ চেণ্টাৰসমূহৰ সৈতে জড়িত লোকসকলে ৰাইজৰ পৰা ২০০/৪০০/৫০০ কৈ যিয়ে যেনেকৈ পাৰে টকা সংগ্ৰহ কৰিছে আধাৰ কাৰ্ডৰ পঞ্জীয়নৰ নামত৷ তেনে এক অভিযোগৰ ভিত্তিতেই ঢেকীয়াজুলি আৰক্ষীয়ে এক অভিযান চলাই নিশাৰ অন্ধকাৰত গোপনে অবৈধভাৱে আধাৰ কাৰ্ডৰ কাম কৰি থকা অৱস্থাত আটক কৰে কম্পিউটাৰ অপাৰেটৰ কুমাৰ লিম্বু আৰু বগৰিবাৰী গাঁৱৰ VDP সভাপতি বিহুৰাম ওৰাংক৷

উল্লেখযোগ্য যে আটকাধীন অভিযুক্তই নিজ মুখে স্বীকাৰ কৰিছে নীতিবহিৰ্ভূতভাৱে আধাৰৰ কাম কৰাৰ কথা৷ দুশ টকাকৈ প্ৰতিজনৰ পৰা সংগ্ৰহ কৰাৰ কথা স্বীকাৰ কৰিছে আৰক্ষীৰ আগত৷ তাৎপৰ্যপূৰ্ণ কথাটো হ'ল - সমগ্ৰ শোণিতপুৰত গেলেক্সী কোম্পানী নামৰ এটা কোম্পানীয়ে ৯৪টা আধাৰ চেণ্টাৰ খুলি আধাৰ কাৰ্ড পঞ্জীয়নৰ কাম কৰি আছে জনৈক জয়ন্ত বণিয়া নামৰ এজন জিলা সমন্বয়কৰ নেতৃত্বত৷ আৰু ইয়াৰে প্ৰায়সংখ্যক আধাৰ চেণ্টাৰতে অবৈধভাৱে ধন লৈ আধাৰ কাৰ্ড প্ৰদান কৰি এখন ক'লা বজাৰৰ সৃষ্টি কৰিছে বুলি বিভিন্ন সময়ত অভিযোগ উত্থাপিত হৈছে ৷ এই দুজন লোক আটক হোৱাটোৱে অভিযোগৰ সত্যতা প্ৰমাণিত কৰিছে যদিও, উপযুক্ত তদন্তই আৰু এনে বহু দিশ উন্মোচিত কৰিব পৰৱৰ্তী সময়ত৷