Assam-Mizoram Clash : মিজোৰামৰ আক্ৰমণত আহত ২ জোৱানক আৰোগ্যৰ বাবে লাগে অসমবাসীৰ প্ৰাৰ্থনা, এয়াৰ এম্বুলেন্সেৰে আনিলে গুৱাহাটীলৈ।

অসম-মিজোৰাম সীমান্ত (Assam-Mizoram Border)ত কাছাৰৰ লাইলাপূৰ (Lailapur, Cachar)ঘটনাত আহত হোৱা আৰক্ষী জোৱান গোপেশ্বৰ সিনহা আৰু আশীষ কান্তি দাসৰ উন্নত চিকিৎসাৰ বাবে মঙলবাৰে সন্ধিয়া শিলচৰ মেডিকেল কলেজ হাস্পতাল (SMCH)ৰ পৰা এয়াৰ এম্বুলেন্স যোগে  গুৱাহাটীলৈ লৈ অনা হয়। বৰঝাৰস্থিত লোকপ্ৰিয় গোপীনাথ বৰদলৈ আন্তৰাষ্ট্ৰীয় বিমানবন্দৰত উপস্থিত হোৱাৰ পিছত  আৰক্ষী জোৱান গোপেশ্বৰ সিনহা আৰু আশীষ কান্তি দাসক এম্বুলেন্স যোগে পোনে পোনে গুৱাহাটী চিকিৎসা মহাবিদ্যালয় হাস্পতাল (GMCH)লৈ লৈ যোৱা হয়।

উল্লেখ্য যে সোমবাৰে মিজোৰাম আৰক্ষী আৰু মিজো দুৰ্বৃত্তই সন্মিলিতভাৱে কৰা আক্ৰমণত অসমৰ ৫ জোৱান শ্বহীদ হোৱাৰ লগতে আহত হৈছিল ৪২ জন জোৱান। এওলোকৰ ভিতৰতে গুৰুতৰভাৱে আহত হৈছিল গোপেশ্বৰ সিনহা আৰু আশীষ কান্তি দাস।

ইপিনে আজি দিনৰ ভাগতে কাছাৰৰ আৰক্ষী অধীক্ষক (SP) বৈভৱ চন্দ্ৰ নিম্বলকৰক উন্নত চিকিৎসাৰ বাবে এয়াৰ এম্বুলেন্সাৰে মুম্বাইলৈ নিয়া হয়। এছপি নিম্ৱবলকৰৰ উৰুত গুলী লগাত গুৰুতৰভাৱে আহত হৈছিল।