যোৰহাটবাসীয়ে দুই এদিনতে লাভ কৰিব দুটা ভাল খবৰ!

দুই এদিনৰ ভিতৰতে যোৰহাটবাসীয়ে লাভ কৰিব দুটা বিশেষ ভাল খবৰ। যোৰহাটত ৰূপায়ণ কৰিব লগা দুটা বৃহৎ প্ৰকল্পৰ বিত্তীয় অনুমোদনকে ধৰি প্ৰশাসনিক কাম-কাজসমূহ প্ৰায় হৈ উঠাৰ পিছত অচিৰেই আনুষ্ঠানিকভাৱে এই দুটা বৃহৎ প্ৰকল্পৰ কথা ঘোষণা কৰিব বুলি জানিবলৈ দিছে যোৰহাটৰ বিধায়ক তথা বিধানসভাৰ অধ্যক্ষ হিতেন্দ্ৰ নাথ গোস্বামীয়ে। যোৰহাট সমষ্টিৰ পথ নিৰ্মাণৰ ওপৰত সৰ্বাধিক গুৰুত্ব প্ৰদান কৰা বিধায়কগৰাকীৰ কাৰ্যকালত প্ৰায় ৩৫০ কিলোমিটাৰতকৈয়ো অধিক পকীপথ নিৰ্মাণ কৰা হৈছে বুলি বিধায়কগৰাকীয়ে জানিবলৈ দিয়ে।

যোৰহাটত উন্নয়নমূলক কাম–কাজসমূহ কৰিবলৈ যাওতে একাংশ দল-সংগঠন তথা লোকে কেতিয়াবা ঋণাত্মক দৃষ্টিভংগীৰে বিৰোধিতা কৰি বাধাৰ সৃষ্টি কৰে বুলি ক্ষোভ ব্যক্ত কৰে বিধায়কগৰাকীয়ে। যোৰহাটৰ পুৰণা এএছটিচি বাছ আস্থান চৌহদত এটা আধুনিক সা-সুবিধাযুক্ত পাব্লিক টয়লেট কমপ্লেক্স উদ্বোধন কৰি বিধায়কগৰাকীয়ে কয় যে তেওঁ একাংশ লোকে কৰি অহা ভাল কামত উৎসাহ দিবৰ বাবে এই অনুষ্ঠানলৈ আহিছে। যোৰহাটৰ জানকী দেৱী আগৰৱালা চেৰিটেবল ট্ৰাষ্টৰ দ্বাৰা ৰাইজৰ সুবিধাৰ্থে নিৰ্মাণ কৰা এই আধুনিক পাব্লিক টয়লেটৰ নিৰ্মাণৰ সময়ত এটা জাতীয় সংগঠনৰ সদস্যই ইয়াৰ বিৰোধিতা কৰি নিৰ্মাণকাৰ্য বন্ধ কৰি দিছিল। বিধায়কগৰাকীয়ে এনে কাৰ্যৰ বিৰোধিতা কৰি কয় যে ৰাইজৰ বাবে যোৰহাটৰ একাংশ লোকে মৌনভাৱে কাম কৰি আহিছে আৰু আমি সেইসকল লোকক উৎসাহ দিব লাগে।

"যোৰহাটত ভাল কাম কৰিবলৈ যোৱাটো কঠিন। এনে কাম কৰিবলৈ যাওতে আমি চেষ্টা কৰিয়েই থাকিব লাগিব। কিছুমান দল-সংগঠনে কেতিয়াবা কেতিয়াবা এনে কামৰ বিৰুদ্ধে ঋণাত্মক ভূমিকা লয়। এই ঋণাত্মক দৃষ্টিভংগীসমূহক আমি আওকাণ কৰি চলিব লাগিব। যোগাত্মক ধাৰণাৰে আগবাঢ়িলে এনেধৰণে ৰাইজৰ কাম কৰিবলৈ আৰু মানুহ ওলাই আহিব।", যোৰহাটৰ বিধায়ক হিতেন্দ্ৰ নাথ গোস্বামীয়ে এনেদৰে কয়।

যোৰহাটৰ জানকী দেৱী আগৰৱালা চেৰিটেবল ট্ৰাষ্টৰ দ্বাৰা বহুকেইটা কামেৰে সমাজলৈ বৰঙণি আগবঢ়াই অহা হৈছে। বিগত বহু বছৰ ধৰি এই ট্ৰাষ্টৰ দ্বাৰা বিভিন্ন স্থানত বৃক্ষ ৰোপণ আৰু ইয়াৰ প্ৰতিপালনৰ ব্যৱস্থা কৰি অহা হৈছে। আৰ্থিকভাৱে দুৰ্বল চাৰি শতাধিক ছাত্ৰ-ছাত্ৰীৰ শিক্ষাৰ দায়িত্ব লোৱাৰ পিছত সেইসকল যুৱক-যুৱতীয়ে শিক্ষা সমাপ্ত কৰি বিভিন্ন স্থানত সংস্থাপন লাভ কৰিবলৈ সক্ষম হৈছে। বৰ্তমান এই ট্ৰাষ্টৰ দ্বাৰা ৫৫ গৰাকী আৰ্থিকভাৱে দুৰ্বল মেধাসম্পন্ন ছাত্ৰ–ছাত্ৰীয়ে ভাৰতৰ বিভিন্ন প্ৰান্তত অধ্যয়ন কৰি আছে। এই ট্ৰাষ্টৰ দ্বাৰাই যোৰহাট নগৰখনত আধুনিক সুবিধাযুক্ত আৰু পৰিস্কাৰ ৰাজহুৱা শৌচাগাৰ আৰু প্ৰস্ৰাৱগাৰৰ নিৰ্মাণ কৰি অহা হৈছে। ইয়াৰ ফলত নগৰলৈ অহা লোকসকল তথা যাত্ৰীসকল বিশেষভাৱে উপকৃত হ’ব বুলি মত ব্যক্ত কৰিছে ট্ৰাষ্টৰ মুখ্য ন্যাসী আনন্দ আগৰৱালাই। অচিৰেই এই টয়লেট কমপ্লেক্সৰ ওপৰ মহলাত যাত্ৰীসকলৰ সুবিধা হোৱাকৈ স্নানাগাৰৰ ব্যৱস্থা কৰা হ’ব বুলিও জানিবলৈ দিয়ে ট্ৰাষ্টৰ কৰ্তৃপক্ষই।