বঙাইগাঁৱত বহিঃৰাজ্যৰ চিলনী চোৰৰ দপদপনি, মহিলাৰ ডিঙিৰ পৰা আঁজুৰি নিলে সোণৰ চেইন

বঙাইগাঁৱত আৰক্ষীৰ জালত বহিঃৰাজ্যৰ দুই চিলনী চোৰ৷ ধৃত চিলনী চোৰ দুটা পশ্চিম বংগৰ সঞ্জু গোৱালা আৰু ৰহিত সিং৷ চুবুৰীয়া ৰাজ্যৰ চিলনী চোৰৰ দলে বঙাইগাঁৱত প্ৰৱেশ কৰি মহিলা এগৰাকীৰ ডিঙিৰ পৰা সোণৰ চেইন এডাল কাঢ়ি উধাও হয়৷ ইফালে , ঘটনাৰ খবৰ পাই আৰক্ষী তৎপৰ হৈ পৰে৷ জিলা আৰক্ষী অধীক্ষক স্বপ্ননীল ডেকা আৰু অতিৰিক্ত আৰক্ষী অধীক্ষক লুনা সোণোৱালে তৎপৰতাৰে অভিযান চলাই ঘটনা সংঘটিত হোৱাৰ প্ৰায় দুই ঘণ্টাৰ পিছতে দুই চিলনী চোৰক কৰায়ত্ত কৰে৷

ঘটনা সংঘটিত কৰি নিউ বঙাইগাঁৱৰ গেং কোৱাৰ্টাৰত আত্মগোপন কৰি থকাৰ সময়তে আৰক্ষীয়ে দুয়োকে আটক কৰে৷ ইফালে, চিলনী চোৰৰ সৈতে জড়িত বেণু দাস নামৰ জুৱেলাৰীৰ স্বত্বাধিকাৰীকো আৰক্ষীয়ে আটক কৰিছে৷ ইতিমধ্যে আৰক্ষীয়ে সোণৰ চেইনৰ লগতে ঘটনাত ব্যৱহৃত বাইক আৰু নগদ দুই হাজাৰ টকা জব্দ কৰে৷

ধৃত দুয়োকে জেৰাৰ পিছত চুবুৰীয়া ৰাজ্যখনৰ কেইবাজনীয়া গেং এটা বঙাইগাঁৱত প্ৰৱেশ কৰাৰ তথ্য লাভ কৰাৰ পিছত তৎপৰ হৈ পৰিছে আৰক্ষী৷ সম্প্ৰতি চিলনী চোৰৰ সৈতে জৰিত সকলোৰ সন্ধানত আৰক্ষীয়ে অভিযান অব্যাহত ৰাখিছে৷