ঘৰলৈ আৰু উভতি যোৱা নহ’ল! মাৰ্ঘেৰিটাৰ চাইডিঙত শোকাৱহ পথ দুৰ্ঘটনা, থিতাতে নিহত এগৰাকী মহিলা, ৬গৰাকীক AMCHলৈ প্ৰেৰণ

মাৰ্ঘেৰিটাত সংঘটিত হৈছে এক ভয়ংকৰ পথ দুৰ্ঘটনা। শিৱসাগৰৰ পৰা সকাম খাই ঘৰলৈ উভতি গৈ থাকোতে মাৰ্ঘেৰিটাৰ চাইডিঙৰ ৰাষ্ট্ৰীয় ঘাইপথৰ সমীপত সংঘটিত হয় দুৰ্ঘটনাটো। দুৰ্ঘটনাৰ ফলত থিতাতে নিহত হয় এগৰাকী মহিলা। আনহাতে গুৰুতৰ ভাবে আহত হোৱা আন ছগৰাকী লোকক ডিব্ৰুগড়ৰ অসম চিকিত্‍সা মহাবিদ্যালয়লৈ প্ৰেৰণ কৰা হৈছে।

জানিব পৰা মতে, শিৱসাগৰলৈ যোৱা দলটো মাৰুটি ইক’ বাহনত গৈছিল। কিন্তু শিৱসাগৰৰ পৰা ঘূৰি গৈ থকা অৱস্থাত গাড়ীখনৰ যান্ত্ৰিক বিজুটি ঘটি চাইডিঙৰ ৰাষ্ট্ৰীয় ঘাইপথৰ কাষত ৰৈ থকা এখন ছিলিণ্ডাৰ ভৰ্তি ট্ৰাকত তীব্ৰ জোৰেৰে খুন্দা মাৰে। ঘটনাত থিতাতে নিহত হোৱা মহিলাগৰাকীৰ নাম টুলু বৰুৱা বুলি জানিব পৰা গৈছে। ইতিমধ্যে ঘটনাস্থলীত উপস্থিত হৈছে মাৰ্ঘেৰিটা আৰক্ষী।